Gilas nahutdan og bala, gilampornas sa Lebanon
CEBU, Philippines — Ang Lebanon nagmangtas sa katapusang kuwarter aron ilampaso ang Gilas Pilipinas, 75-54, sa 2nd Doha Invitational Cup sayo kagahapon sa buntag didto sa Qatar University Sports and Events Complex.
Sila si Jad Khalil, James Majok, Gerard Hadidian ug Karim Zeinoun mibomba sa Gilas og makabungog nga 14-2 rally sa nag-unang singko minutos sa katapusang kuwarter nga nagtuboy sa Lebanon nga ngadto sa 21 puntos nga demolisyon sa mga Pinoy.
Sa wala pa ang mainit nga ratsada sa mga Lebanese, sikit pa unta kaayo ang duwa diin ang Gilas alkansi lamang og usa ka lugas, 50-51.
Sa kinatibuk-an, gilabhan sa Lebanon ang Gilas sa pinal nga 12 minutos sa aksiyon, 24-6.
Tungod niini, nakawang ang maandot nga salida ni Justine Brownlee nga mipupo og 21 puntos ug 11 ka rebounds. Apan bisan ang beteranong naturalized player namugnaw sab sa endgame hinungdan nga ang Gilas nakatilaw sa una nilang pilde ning tulo ka adlaw nga torneyo.
- Latest
