UC nanghawod sa SHS-AdC/Taiwan Taoyuan Table Tennis Invitational
CEBU, Philippines — Ang University of Cebu (UC) Webmasters naghari sa Sacred Heart School-Ateneo de Cebu/Taiwan Taoyuan Municipal Yung Feng High School Under 22 Invitational Table Tennis Friendly Championship Cup didto sa SHS-AdC Magis Eagles Arena sa Barangay Canduman, dakbayan sa Mandaue ning bag-ohay pa lamang.
Ubos sa pagtimon ni UC Athletic Director Jessica Jawad Honoridez nga usa sab ka dekalibreng coach, ang Team UC nga gilangkoban sa manasoong Gabriel David ug Rafael David Misa, Andrie Caballes ug Le Vhin Villanueva miabli sa ilang kampanya pinaagi sa kulbahinam nga daog, 3-2, batok sa Ateneo de Manila University sa ilang best-of-five nga sangka.
Gisundan kini nila og 3-0 nga pagkastigo sa SHS-Ateneo de Cebu sa wala pa miangkon og luna sa final uban ang 3-1 nga kadaogan batok sa `University of San Jose-Recoletos (USJ-R).
Sa kampiyonato, ang UC milampornas sa mga bisitang Taiwanese gikan sa Taoyuan Municipal Yung Feng High School, 3-0, aron langkaton ang korona.
Gawas sa tropeyo ug sertipikasyon, ang UC mibulsa sab og P10,000 nga ganting salapi.
Sa laing bahin, gisaw-an sa USJ-R ug University of San Carlos (USC) Team D ang ikatulong puwesto sa usa ka adlaw nga torneyo.
- Latest
