Ukrainian 7-footer bag-ong sentro sa Lakers

CEBU, Philippines — Ang Los Angeles Lakers mibira sa Ukrainian nga sentrong si Alex Len human nadisakaril ang gilihok nilang trade nga maghatud unta kanila ni Mark Williams.

Si Len, nga anaa karon sa ika-12 niyang season sa NBA, motapon sa Lakers, nga maoy ikaunom niyang team, tulo pa lamang ka adlaw sukad ang 31-aqnyos nga 7-footer gibuhian sa Washington Wizards.

Ang Lakers nakasilyo na unta og kasabotan uban sa Charlotte Hornets aron kuhaon ang 7-footer sab nga si Williams apan wala kini mahinayon gumikan kay si William wala mapasar sa medikal nga eksaminasyon.

Mao kini ang nakapaaghat sa Lakers nga mangita dayon og laing big man nga ikatambayayong sa duha nila ka superstars nga sila si Luka Doncic ug LeBron James human sa pagbiya ni Anthony Davis nga atoa na karon sa Dallas Mavericks hulip ni Doncic.

Ang tubag mao si Len, nga gikataho nga hapit na untang mopirma uban sa Indiana Pacers sa wala pa miabot ang oportunidad sa Lakers.

Si Len maoy No.5 overall pick sa Phoenix Suns niadtong 2013 NBA Draft. Miduwa siya sud sa lima ka tuig uban  sa Suns sa wala pa mobahin sa Atlanta, Sacramento, Toronto ug Washington sa wala pa mibalik sa Sacramento hangtud nga naabot siya sa Washington isip kabahin sa usa ka three-team trade sa miaging season. Sa tibuok niyang karera, si Len mi-average og 6.7 puntos ug 5.3 rebounds sud sa 680 ka duwa. Uban sa Kings ning season, mi-average lamang siya og 1.4 puntos ug 1.8 rebounds matag duwa.