Hinaot nga makonsiyensiya

Mas makapasuko ang padayong pagyaka ni Senate President Chiz Escudero sa impeachment trial ni Bise Presidente Sara Duterte kon mahibaw-an sa mga magbubuhis unsa kadagko ang suholan ug benepisyo sa mga senador bisan kon mas daghan ang ilang bakasyon (80%) kay sa ilang trabaho (20%).

Gawas sa suholan nga ?278,434 kada buwan (o ?9,281 kada adlaw), makalilisang ang mga benepisyo nga nadawat nga dili kinahanglang i-detalye sa pag-liquidate ngadto sa Commission on Audit (COA) kada tuig. Igo nang mopirma sila og certification nga nahurot og gasto ang pundo.

***

Palihug panggunit sa imong lingkoranan. Mao ni ang akong nakuha nga lista sa COA sa ?53 milyones nga nadawat sa kada senador niadtong 2020:

• Extraordinary ug Miscellaneous Expense sa ilang opisina ug mga komitiba: ?7.6 milyones;

• Lokal ug langyawng mga laag, aw biyahe: ?933,432;

• Meetings ug conferences: ?538,223;

• Professional ug consultancy fees: ?11.1 milyones;

• Supplies ug materials: ?8.3 milyones;

• Rental sa mga sakyanan ug ekipo: ?1.3 milyones;

• Other MOE (mao tingali ni ang uban pang maintenance and other operating expenses): ?23.2 milyones.

***

Mas buhong pa g’yud ang mga senador karong tuiga:

• Kada usa nila dunay dugang nga ?200 milyones human bahini sa House of Representatives og ?5 bilyones gikan sa ?26 bilyones nga aprubadong budget sa Ayuda Para sa Kapos ang Kita Program bugti sa pagbakwi sa ila untang pagsupak sa AKAP; ug

• Kada usa nila duna pa gyoy dugang ?47.8 milyones human gipaburot ang budget sa Senado gikan sa ?12.8 bilyones nga gisugyot sa National Expenditure Program nga gisumiter sa Malacañang sa Kongreso ngadto sa ?13.9 bilyones nga maoy misteryuso nga giaprobahan sa bicameral conference committee.

***

Bisan sa nagbuntaog nilang suholan ug benepisyo (sa walay paghisgot sa binilyon ka pesos nga komisyon sa nakalusot nilang pork barrel projects) ug kanihit sa mga adlaw nga gitrabahoan ug kaabunda sa mga adlaw sa pahuway, magpa-ugat pa g’yung mga senador pagpalabi sa ilang bakasyon kay sa trabaho nga sila ray makahimo ubos sa 1987 Constitution?

Hinaot nga kusion sa ilang konsiyensya ug mapugwat. Nga kinahanglan diayng himuon ang ilang trabaho. Forthwith. Sa labing dali nga panahon.