POC umaasang lolobo pa ang Team Philippines

MANILA, Philippines —  Optimistiko ang Philippine Olympic Committee (POC) na madaragdagan pa ang pambansang de­legasyon na sasabak sa 2024 Paris Olympics sa Hulyo.

Umakyat na sa 11 ang mga Pinoy athletes na nagkwalipika sa Paris Games — magandang balita para sa ika-100 selebrasyon ng partisipasyon ng Pilipinas sa Olympics.

“Eleven, formally, and counting,” ani POC president Bambol Tolentino.

Na-excite si Tolentino nang madagdag sa lista­han sina gymnast Levi Jung-Ruivivar at rower Joanie Delgaco sa loob lamang ng 24 oras.

Nakapasok si Jung-Ruivivar noong Biyernes ng gabi sa FIG Artistic Gymnastics World Cup na ginaganap sa Doha, Qatar kung saan nakasiguro ito ng pilak na medalya.

Makakasama ni Jung-Ruivivar sina world cham­pion Carlos Yulo at Southeast Asian Games champion Aleah Finnegan sa Paris Games.

Nadagdag naman si Delgaco na tumapos sa ikaapat sa women’s single sculls 2,000 meters sa World Rowing Asian and Oceania Olympic/Paralympic Qualification Regatta/Asian Rowing Cup na ginaganap sa Chungju, South Korea.

“Congratulations to our new qualified Olympians. Their dedication, perseve­rance and exceptional ta­lent are an inspiration to us all,” ani Tolentino.

Handa si Tolentino na suportahan ang mga Pinoy athletes na sasabak para makasungkit ng medalya sa Paris Games.

Umaasa si Tolentino na marami pang Pinoy athletes na papasok sa Paris Games.

“We expect more of our athletes to be in Paris as the qualifiers in various sports are still being conducted,” ani Tolentino.