Dili botaran ang intsik?

Ipa-imbestigar ni Presidente Ferdinand Marcos, Jr. ang posibleng pagpanghilabot sa China sa umaabot nga eleksiyon karo’ng Mayo.  Gipanghimakak sa China ang maong alegasyon. Dili bag-o kining pagpanghilabot sa mga dagko’ng nasud sa atong lokal nga mga kalihokan. Gani mosuporta man usab sila’g mga lokal nga kandidato.  Ang dakong pangutana mao nga aduna ba gyud kaha’y mahimo ang Pilipinas kabahin niini?  Matud pa sa akong amigo, “Igo ra gyud tawon sa pag-kampanya ang administrasyon nga dili lang pabotaran kadtong mga kandidato nga pro-China ug kadtong adunay Intsik nga apelyido.” Madahaan!

Barogan ang hambog

Nasagmuyo si Agriculture Secretary Francisco Tiu Laurel, Jr. sa pamahayag ni Bise Presidente Sara Duterte nga ang kalidad sa P20 matag kilo nga bugas nga gibaligya dili angay nga ipakaon sa tawo kon dili sa mga hayop lamang.  Dili kay ang bise presidente lang ang mipadayag sa maong kabalaka kon dili lakip usab ang katawhan, base sa ilang kasinatian sa matang sa bugas gikan sa NFA.  Nakaingon hinoon ang akong amigo nga, “Maayo kining maong kalambuan kay mapugos ang kagamhanan pagbaligya og nindot nga bugas arong pagsustenir sa ilang pagpangandak.” Fezteleern!

‘Foolishness of a man’

Gitangtang na sa iyang katungdanan kadtong school principal nga nangasaba sa mga tinun-an sa senior high school kay nagsul-ob sila og toga atol sa ilang graduation ceremony didto sa Laua-an, Antique kay nakasupak kuno kini sa polisiya sa DepEd.  Wala hinoon ang principal tangtangi sa iyang lisensya ug mahimo gihapon siya’ng motudlo sa laing eskwelahan.  Dili gyud maayo kon mohimo kita’g hukom samtang nagsipok ang atong panghunahuna.  Kining nahitabo sa principal makapahinumdum sa binugang nga iningles sa akong nanay nga naga-ingon, “The foolishness of a man, go home to his body.”  Muleeng!

I-announce nga dili ipahibawo

Gimanduan sa Department of Trade and Industry (DTI) ang Philip Morris Fortune Tobacco Corporation (PMFTC) nga hunongon na niini ang pag-promote sa Steve Aoki concert karong bulan sa Hulyo.  Ginadili sa balaod (R.A. 11900) ang pag-sponsor sa bisan unsang sport, concert, cultural o mga art event.  Dayag nga dako’ng tabang ang sponsorship sa PMFTC sa pagpahigayon  sa maong konsiyerto.  Sugyot sa akong amigo aron mapadayon ang sponsorship nga dili makalapas sa balaod, moingon na lang unya ang emcee nga, “Ako unta’ng ipahibawo sa tanan nga usa sa dakong sponsor ni’ng atong concert mao ang PMFTC, apan kay supak man lage sa balaod, dili na lang nako ipahibawo.”  Atala lagee!

Nag-FB sab diay

Mipasaka ang Regional Highway Patrol Unit-7 og kaso nga alarm and scandal ingon man unjust vexatio batok sa duha ka Cebuano content creators/vloggers tungod sa ilang content nga gi-ingon’g nagbutang sa kakuyaw dili lamang sa ilang kaugalingon kon dili lakip na sa uban’g mga motorista ug pasahero.  Tungod sa kadaghan na sa mga vlogger, medyo naglumbaanay na’g imbento kon unsay maayong content nga ipasundayag.  Mora’g napanglantawan sa akong amigo nga ang mahimong depensa sa gikasuhan nga mga vlogger mao ang pag-ingon nga, “Hasta man gani pud inyong mga kawani mag-post-post man pud gani sa Facebook.”  Pagkatoytoy!