EDITORYAL - Mga bentahosong vendors

Pagpakauwaw sa Sugbu ang gibuhat aning pipila ka mga vendors sa palibot sa mga venues sa Palarong Pambansa, ‘dolyares’ matud pa sa mga bisitang delegado ang presyo sa palaliton sa palibot sa venues dinhi sa Cebu City.

Ning bag-o, dunay report nga milayat og 200 porsiyento ang pagsaka sa presyo sa bottled water duol sa mga venues.  Dili lang kay tubig , kondili hasta pud mga pagkaon ug pang snacks, mga prutas ug uban pa nga maoy pangitaon sa mga atleta.

Ang mga batang kuwang sa budget, aw maglaway nalang intawong pagtan-aw. Dili baya tanang atleta mga adunahan og pamilya, ang uban kanila mga taga hilit nga bahin sa nasud nga gipalad lang mga makaapil sa palaro tungod sa ilang talento ug sakripisyo para maghatag og dungog sa ilang mga rehiyon ug pangandoy sa kinabuhi kutob sa ilang makaya.

Unsa may tan-aw diay nila sa mga atleta ug mga delegado mga turistang nanganhi aron mogasto-gasto? Dunay mga allowances ang mga bata, apan budgeted kini.

Sa pagkatinuod lang, ang uban sa mga atleta nagtip-ig ug nagdaginot aron aduna pa silay madala pauli ngadto sa ilang pamilya agi og pagpasalamat sa ilang mga kabanay nga nitabang sa ilang panaw pagka-atleta sama sa pagsawo sa ilang mga ginbuhaton sa balay kay sila nag-praktis, nagpalit og sapatos, ug uban pa.

Maayo tingali nga susihon sa lokal nga mga otoridad sa Cebu City kining hinakog nga gipakita sa mga vendors ngadto sa mga bisita tungod kay magbilin kini og negatibong impresyon sa imahe sa Sugbu ug sa mga Sugbuanon nga mga bentahoso.

Dunay panultihon “first impression, last.” Di man tingali gusto sa mga Sugbuanon nga mahinumdoman sila nga mga hakog ug way konsiderasyon.

Sobra-sobra kaayong makapaginansiya, tungod ba kaha walay nireklamo? Way nireklamo kay wala man say kadangpan o kasumbongan dayon ang mga delegado nga moaksyon dayon.

Usa pa, hasol na kaayo para lang sa usa ka botelyang tubig. Ang tawong way kadangpan, adto sa social media moyawyaw, ug dili kini maayo para sa imahe sa Sugbu.