Kuyaw og ilisan

Sige kita nga makabasa og balita kabahin sa daghang shabu (methamphetamine hydrocloride) nga nasakmit sa atong mga tinugyanan sa balaod, sama sa Bureau of Customs, kapolisan, Philippine Drug Enforcement Agency ug ubang law enforcement units.

Didto sa Batangas, usa ka van nga shabu ang nasakmit atol sa gipahigayong checkpoint operations. Sa lainlaing mga dapit, apil dinhi sa Sugbo ug ubang bahin sa Central Visayas, daghan sab nga mga shabu ang nasakmit.

Atol sa akong programa sa radyo, dunay misugyot og mga pamaagi aron nga maalkontrahan ang mga tinonto sa ubang tinugyanan sa kagamhanan, sama pananglit sa pag-ilis sa nasakmit nga shabu og ubang kemikals nga mora lang usab og shabu kun tan-awon.

Bitaw, nasabtan dayon nako ang gustong ipasabot sa akong tigpaminaw sa programa.

Kuyaw bitaw tinuod kun ang mga shabu nga nasakmit ilisan ra og mga tawas, unya ang tinuod nga mga “high-grade” nga shabu, ibaligya ra sa mga malditong tinugyanan sa balaod ngadto sa mga kaila nilang druglords.

Imposible ba gud? Mora’g dili man imposible kay karong panahona, daghan kaayong mga bilyako, ilabi na nga pwerteng mahala na sa kantidad sa shabu.

Tiaw mo nga kadtong shabu nga nasakmit didto sa lungsod sa Alitagtag, Batangas nagkantidad og P13 Bilyones, unya duna pay laing shabu nga nasakmit didto sa Infanta, Quezon sa miaging Marso nga kantidad usab og P11 Bilyones.

Dinhi sa Cebu ug ubang bahin sa Central Visayas, makabasa usab kita og balita nga daghang shabu ang nasakmit sa kugihan natong mga tinugyanan sa balaod.

Husto ang sugyot sa akong tigpaminaw nga sa dili pa sunogon, o i-dispose ang maong mga shabu nga nasakmit, angay’ng himoan usa og random laboratory test aron pagmatuod kun tinuod pa ba nga shabu ang ilang pangsunogon.

Dili ba maayo? Maayo og mahuna-hunaan kini ug himoon unta sa atong kadagkoan sa kapolisan, PDEA ug ubang law enforcement units.  

* * *

Maayo kay nadutlan na gyud ang Tokagawa Global Corporation, ang tagdumala sa CEPMA nga maoy ilang collection arm, ug wa na mangolekta og parking fees sa mga moparking daplin sa karsada atol sa adlaw’ng Domingo dinhi sa Cebu City.

Mihunong sila kay gimando man gyud ni Mayor Michael Rama nga pangdakpon ang mga kawani sa CEPMA nga padayong mangolekta og parking fees sa Domingo nga wa itugot sa ordinansa sa siyudad.

Hinoon, panid-an gihapon nato kun tanang lugar na ba gyud nga wa na sila mangolekta. Pero, awhagon nako kamong mga tag-iya’g sakyanan nga basta Domingo gani, ayaw gyud mo pagbayad og parking fee kay ilegal na.

Masuko gyud si Mayor Michael Rama nianang pangabuso sa CEPMA nga bisan way apil ang Domingo, mangolekta gyud.