Happy ending sa City Hall
Duna koy duha ka sugilanon nga usa ra ang ending. Pulos nagpahinumdom natong tanan nga ang pagpangabuso mosumbalik sa mga abusado. Pulos nagdasig sa mga biktima nga ang pagbarug sa ilang mga katungod dunay kapuslanan. Pulos nagmatuod nga ang bisan unsang kalibogan mahusay ra sa katin-awan.
Kining duha ka sugilanon pulos naglambigit sa mga opisyal sa Cebu City. Nga nahibaw-an nako gikan sa mga magbubuhis nga nahugno sa pabor-pabor nga pagpatuman sa balaod ug sa pag-usab-usab sa mga lagda nga imbes mopahapsay niresulta hinuon sa dugang kahasol ug kalangay.
* * *
Ang unang sugilanon naglambigit sa pamilya nga tag-iya og mga luna sa syudad. Nipasangil ang pamilya nga ang negosyante nga nigamit sa ilang luna wa moabang. Human nidangop sa Cebu City Hall, ang Legal Office nirekomendar nga di hatagan og business permit ang negosyante kay way balidong lease contract.
Pero ang negosyante nakakuha gihapon og business permit. Dihang nibalik pagreklamo ang pamilya sa City Hall, giingnan sila nga ang liderato gustong modasig sa mga negosyo ug mao ray magbuot ipatuman ba o dili ang mga panginahanglan sa business permit.
* * *
Ang ikaduhang sugilanon naglambigit og laing pamilya nga tag-iya sab og mga luna sa syudad. Nangadto sa assessor’s office pagkuha og mga dokumento nga gikinahanglan sa dinaliang transaksiyon. Pero giingnan sila nga gidili nang walk-ins kay computerized nang operasyon ug kinahanglang magpa-rehistro online.
Nagparehistro sila online ug nagpaabot og pila ka semana una naatiman. Mas maayo pang manu-mano nga sistema sa ubang syudad ug lungsod nga nakahatag nila sa mga dokumento sud lang sa pila ka oras.
* * *
Wa kong kahibawo kon nagkaila ba ang mga pamilya ning duha ka sugilanon. Ambot nagkaabot ba kay managlahi man ang ilang mga transaksiyon sa City Hall. Pero managsama nga nakaangkon og happy ending ang ilang mga sugilanon gahapon.
Kay ang mga opisyal nga aroganteng nipahibawo sa unang pamilya nga sila ray magbuot kanus-a ipatuman ug di ipatuman ang balaod ug ang mga opisyal nga nilisud-lisod sa ikaduhang pamilya, bisan nanghangyo nga atimanon na lang kay didto na man gyod sa ilang upisina, pulos naapil og kasuspenso ni Cebu City Mike Rama sa mosunod nga unom ka buwan nga way suweldo.
* **
- Latest
