Hunyo! Gubat batok lamok!

Niadtong Mayo 30, 2025, opisyal nga gipahibalo sa PAGASA ang pagsugod sa Habagat o southwest monsoon season dinhi sa Pilipinas.

Samtang kini nagdala og gikinahanglan nga ulan para sa atong mga uma ug kabukiran, nagdala usab kini og hilabihan nga hulga, ang posibilidad sa pagsugod sa dengue fever.

Ang buwan sa Hunyo giila isip National Dengue Awareness Month subay sa Proclamation No. 1204 nga gipagawas niadtong 1998.

Gituyo kini aron palambuon ang kahibalo sa katawhan kabahin sa dengue ug sa mga pamaagi sa pagpugong niini.

Sa samang panahon nga nagkusog ang ulan, misaka usab ang peligro sa dengue, tungod kay ang tubig nga nagtiner sa palibot mahimong puy-anan sa lamok nga Aedes aegypti nga nagdala sa maong sakit.

Padayon ang kampanya sa Department of Health (DOH) pinaagi sa ilang 5S strategy, Search and destroy (pangitaon ug laglagon ang mga lugar nga puy-anan sa lamok), Self-protection measures (paggamit og panalipod sa kaugalingon), Seek early consultation (pakonsulta dayon kung adunay sintoma), Support fogging/spraying (musuporta sa pagpabuga og insecticide sa hotspot areas), ug Sustained hydration (padayon na hydration).

Apan dili lang kini responsibilidad sa DOH. Kinahanglan og kooperasyon sa matag komunidad. Ang paglimpyo sa palibot, paglikay sa tubig nga nagtiner, ug pagsul-ob og panalipod nga sinina usa sa mga yawi aron malikayan ang dengue.

Sa panahon nga padayon ang pagbag-o sa klima, posible nga magkagrabe pa ang epekto sa Habagat, ug maglisod kita sa pagpugong sa mga sakit nga dala sa lamok.

Ayaw na hulata nga modaghan pa ang kaso sa dengue. Karong Habagat, karon pud ta molihok. Himuong giya ang National Dengue Awareness Month sa matag panimalay, eskwelahan, ug barangay. Pinaagi sa tinabangay ug pagpakabana, malampasan nato ang unos, ug ang sakit nga posibleng mokuyog niini.