EDITORYAL - Text scams

Kinahanglang magmatngon gyud ang tanan, ilabi na kining mga tiggamitan og cellphones karong mga panahona tungod halos tanang binuang, dili lang pangkomedya kondili pagpangilad ipaagi na niini.

Ning bag-o, ang CT-TODA o City of Talisay Traffic Operations and Development Authority mibutyag nga aduna silay nadawat nga text scam. Ang mensahe matud pa, nagmando sa nakadawat sa text sa pag click sa link nga gipasupot aron didto mobayad sa ilang multa sa traffic violations.

Nagpasabot kini nga ang puntariya sa scammers mao ang mga traffic violators. Unya dunay link nga kinahanglan i-click.

Kaning maong text matud pa nagpakaaron-ingnong gikan sa CT-TODA nga naghatag og guide sa traffic violators kun asa mobayad nga di kinahanglang maghasol-hasol sa pag-adto sa ilang opisina para mobayad sa multa.

Kinsa may dili ganahan ana, di na mahasol. Pwede rang mobayad pinaagi sa online transaction. Apan pulos diay kadto bakak. Giingong scam kini ug peligro kaayong mailad ang nakadawat sa text.

Kay ang pangulo sa CT-TODA nga si Jonathan “Joy”Tumulak sa balita sa Banat News kagahapon miingon nga wala silay online transaction nga sama niini. Dili sila maningil sa multa sa mga traffic violators pinaagi sa online transaction.

Ang makapahibulong lang ani, giunsa man kaha sa scammer pagkahibalo nga ang ilang gi-teksan nakalapas gyud sa lagda sa trapiko diha sa Talisay? Hinuon, si Tumulak miingon, nga dili lang sila sa CT-TODA ang nakadawat ani nga gituohang text scam.

Niadtong nakalabay nga semana, ang Lapu-Lapu City mipahibalo nga duna silay planong ipaagi na sa online ang pagbayad og multa sa mga traffic violators. Hinuon, wala pay balita kun nahinayon ba kini.

Ang mga online scammers mogamit og mga links aron ilaron ang mga tawo. Tumong ani nga makuha ang mga importanteng impormasyon sa tawong buot nilang biktimahon sama sa pangalan, edad, sex, address, ug personal nga impormasyon lakip na mga bank accounts.

Duna pay uban nga mangayo og face identification, kunohay kuhaan og litrato. Kuyaw kaayo kini tungod kay nakuha na ang kompletong impormasyon , naa pa gyuy mga pictures.

Kini tanan pwedeng gamiton sa binuang sa mga eksperto sa cyber scamming ug ang makaluluoy ang biktima.