Rama suspendido?

Sa pagsuwat ko niining lindog sibaw na ang kasayuran nga gisuspenso sa Ombudsman sulod sa unom ka buwan si Cebu City Mayor Michael Rama ug laing pito pa ka mga opisyal sa dakbayan.

Kini may labot sa reklamo sa upat ka mga kawani sa City Hall nga iyang gibalhin ug wa sweldohi sulod sa 10 ka buwan.

Wala pay opisyal nga kopya sa kamanduan gikan sa Ombudsman hangtod sa pagsuwat ko niining lindog.

Si Rama wala pa sab makadawat og kopya sa kamanduan. Matud sa mayor nga wala sab siya masayod sa reklamo batok niya sanglit wala siya makadawat og kopya ni gipatubag sa reklamo.

Kun tinuod ang migawas nga kasayuran di na ko mahibong niini. Ug gani sa milabay nakong mga lindog daan na ko nag-ingon nga swerte na si Rama kun di siya masuspenso hangtod sa kampanya sa sunod nga eleksiyon karong Mayo 2025.Wala lang ko magdahom nga ingon ini ka sayo moabot ang iyang suspension.

Apan alang sa upat ka mga kawani nga wala masweldohi sud sa 10 ka buwan hustisya ni ug kadaugan.

Dili lalim ang gidangatan nilang Sybil Ann Ybañez, Maria Almicar Diongzon, Filomena Atuel, ug Chito Dela Cerna nga wala sweldohi sud sa taas nga panahon.

Tungod kay alang sa ordinaryong mga kawani sa gobyerno nga nagsalig sa ilang sweldo aron mabuhi sobra pa sa kalbaryo ang 10 ka buwan nga di kadawat og sweldo.

Leksiyon sab ni sa ubang mga opisyal nga naa sa pwesto nga may kinutuban ang pagpanglupig.

Ug hayan duna pay laing mga suspension order nga moabot batok ni Rama. Kini tungod kay gawas niining reklamo sa upat ka mga kawani duna pay laing mga reklamo nga gisang-at ang MCWD ug CPA.

Kun dimalason si Rama dili na siyang kabalik sa City Hall hangtod mahuman iyang termino sunod tuig.

Ug niining pagbali sa hangin sa politika, usa ka tawo ang nagkatawa sa hilom tungod kay siyay naka benepisyo---ang batan-ong bise mayor nga si Atty. Raymond Garcia.

Ug di sulagma nga siya pag-umangkon ni Gobernador Gwen Garcia.