Compensation ug suspension

Gisuspenso sa buhatan sa Ombudsman sulod sa unom ka buwan si Cebu City Mayor Mike Rama ug ang lain pang pito ka mga opisyal sa kagamhanang lokal sa dakbayan sa Sugbo tungod sa kapakyas niini sa paghatag sa saktong suholan sa mga kawani sa City Hall.

Lakip sa gisuspenso mao sila si City Administrator Atty. Collin Rosell, OIC City Assessor Dr. Maria Theresa Rosell, Legal Officer designated assistant department head atty. Francis May Jacaban, designated assistant department head for operations Angelique Cabugao, designated admin division head Jay-ar Pescante, designated assessment of records management division head Lester Joey Beniga ug Computer division head Nelyn Sanrojo.

Gi-question sa Mayor ang pagsuspenso kaniya tungod kay wala siya makadawat og reklamo mahitungod niini. Hinuon giingon sa Mayor nga kun ugaling anaa may suspension alang kaniya, ang iya nang mga abogado ang mag-igo niini.

Kun tinuod man nga wala masayod ang Mayor sa reklamo nga gipasaka batok kaniya sa buhatan sa Ombudsman maingon nato nga biktima pud sa binuang sa pagpadala og summons ang Mayor.

Hinuon, puyde pud nga nakalimot lang sa pagpahibawo sa Mayor ang iyang mga abogado. Poyde ra pod nga nasayod ang Mayor niini ug nagpakaaron-ingnon lang nga wala siya masayod.

Hinuon, angayan nga masayran sa mga yanong lungsoranon nga adunay duha ka klase ang suspension. Adunay suspension isip silot o penalty ug preventive suspension.

Ang suspension isip silot o penalty  nga ipahamtang resulta kini human matimbang-timbang ang mga ebidensiya nga gipresentar sa reklamante ug sa gireklamo. Samtang ang tumong ug tuyo sa preventive suspension mao ang pagpugong sa gireklamo sa pag gamit sa iyang inpluwensiya sa iyang position ug sa iyang opisina.

Ang suspension nga gipakanaug sa Ombudsman batok ni Mayor Mike Rama ug sa lain pang pito niya ka mga kaubang opisyal kay preventive. Busa dili kini kabalakan sa Mayor ug sa iyang mga dumadapig. Hinuon, dili na pod siya makatrabaho sa iyang opisina.