Inihap na lang ang mga adlaw
Dihang niinsistir si kanhi Executive Secretary Vic Rodriguez nga fake news ang mga huhungihong nga taktakon siya sa puwesto, pila ka adlaw sa wa pa siya mapalagpot sa gabinete, daghan ang nituo niya. Kay giisip siya nga labing suod sa presidente ug ikaduha nga labing gamhanang opisyal sa Malakanyang.
Dihang nagsunod og pasalig silang Finance Secretary Benjamin Diokno ug Presidente Ferdinand Marcos Jr. nga fake news ang mga pangangkon nga taktakon na si Diokno sa puwesto, daghan sab ang nituo nila. Ambot pila na lang ka adlaw si Diokno sa gabinete.
* * *
Matod ni Diokno nangaraan na siya sa gobyerno nga wa na siya makugang sa mga taho nga wa matagbaw si Marcos sa kahimtang sa nasudnong ekonomiya ning ikalimang buwan na sa ilang administrasyon.
Mahimo tinuod nga gipalutaw lang sa mga naibog sa iyang puwesto. Mahimo sang gipasiugdahan sa palasyo pagsukod sa reaksiyon sa mga negosyante ug ubang sektor. Ang beterano sa burukrasya nga si Diokno nasuhito nga di siyang kasalig sa Malakanyang. Nga gikaintapang napuno sa mga gahong nga may mga sawa nga andam nga motukob ni bisan kinsa.
* * *
Abunda ang mga timaan nga ang kapuslanan ni Diokno sa administrasyon–ang pagkumbinser sa mga negosyante ug ubang kanasuran nga dunay klarong ekonomikanhon nga mga plano si Marcos–nagkapupos na.
Mahimong tungod sa kapakyas sa economic team ni Diokno pagbadlong sa paspas nga sulbong sa mga presyo ug pagtibugsok sa peso. O tingali mas apurado nang mga hunghong sa presidente nga panahon nang magtudlo og economic managers nga moyango niya sa way pagpaka aron ingnon nga may independenteng panghunahuna.
* * *
Usa sa mga timaan nga sentensiyado na si Diokno maong laktod nga pagkataktak sa iyang sinaligan nga si Lilia Guillermo gikan sa Bureau of Internal Revenue (BIR). Ang pagtudlo og puli nga labing hilaw og katakos pero labing lunod-patay sa presidente maoy mensahe nga di morisgo ang administrasyon sa mga opisyal nga di nila kagawongan.
Kon matangtang sab si Budget Secretary Amenah Pangandaman, laing sinaligan ni Diokno, nahibawo na siya kinsay sunod nga mamutos. Samang way ek ang palasyo unsay gidangatan ni Guillermo, wa say garantiyang makabalik si Diokno sa kanhi lingkoranan sa Bangko Sentral ng Pilipinas (BSP).
- Latest
