Walo ka sakop sa gun-for-hire gangs, nadakpan

CEBU, Philippines — Walo ka mga gipasanginlang miyembro sa duha ka gun-for-hire groups nga nag-operate sa Siyudad sa Sugbo ug mga silingang Probinsiya ang nadakpan sa gihimong subsob nga operasyon sa Mambaling Police Station 11 Cebu City Police Office gikan sa  January 17 hangtud sa Marso 1, 2025.

Kini maoy gipahibawo ni Police Regional Office (PRO)-7 Director Brigadier General Redrico Maranan diin matod niya ang maong mga grupo maoy responsible sa shooting incidents sa Cebu City sa milabay nga mga semana.

Kining walo lain-lain og papel sa operasyon kun duna silay patyon nga tawo. Apil na ang gunman, lookouts ug mga contacts. Nakuhaan sab sila og 166 grams nga shabu.

Ang maong grupo mga sakop sa Tañeza group ug Ylaya Group nga nag-operate sa Cebu City ingon man sa mga silingan nga probinsiya isip mga gun-for-hire.

Nagtuo si Maranan nga sa ilang pagkasikop mamenusan na ang mga kaso sa pagpamusil sa siyudad.

Si Maranan daan ng mimando kang Cebu City Police Office(CCPO) director Colonel Enrico Figueroa ingon man sa 151 ka mga Chief of Police sa tibuok rehiyon nga hingusgan ang operasyon batok sa gun-for-hires ug pag-recover sa mga loose firearms.

“Sa ngayon sila yung tinitignan namin na responsible sa shooting incidents natin dito sa Cebu City at usually paid gun sila. Sila yung mga gun-for-hire na binabayaran para patayin yung mga kalaban, pwedeng sa personal grudge, pwedeng sa relationship and pwede din sa mga drugs, drug related killings, sila yun and there are reports that this groups are utilizing minors as gunmen or lookout,” sigon ni Maranan.

Gatuo ang kapulisan nga dugay na matod pa nag-operate ang maong mga grupo kay dili dali ang mag-organisar og grupo aron mopatay og tawo.

Samtang sila mga lokal, duna silay pinaka-lider, financier ug gunmen, lookouts, naa say mohatag og motorsiklo ug mopalit og armas.

 Gikonsiderar sa kapulisan nga ang Tañeza ug Ylaya Group dili na maka-operate sanglit sagad sa ilang mga miyembro nadakpan naman ug nagpadayon ang ilang operasyon batok sa ubang mga sakop.

Walo ka mga armas ang nasakmit gikan sa grupo ug kini ipaubos tanan sa cross matching ug ballistic examination aron pagsusi kun nagamit kini sa ubang mga krimen.

Wala gisalikway sa PRO-7 posibleng magamit sila sa umaabot nga National ug Local election karong Mayo.

Sa walo nga nadakpan lima lang ang napresentar sanglit ang uban gidala na sa Cebu City Jail Male Dormitory sa Barangay Kalunasan.

Ang leader sa grupo nga si Jumil Bataycan, 21, miingon nga wala siya gisugo ug kaugalingon niyang kabubut-on nga mamusil tungod sa nasinati niya kaniadto sa dihang bata pa siya nga dapatan siya maong nanimawos sa mga tawo nga nakasala niya.

Unang higayon matud pa niya nga mapriso ug usa pa iyang napatay apan daghan na siya og napusilan. (BANAT NEWS)