Drayber sa motorsiklo nalatayan sa ligid sa wing van patay
CEBU, Philippines — Patay ang usa ka 23-anyos nga lalaki kinsa napisat ang lawas human kini nalatayi og wing van diha sa national highway sa Proper Barangay Perrelos, Dakbayan sa Carcar niadtong Miyerkules, Marso 12, 2025.
Ang biktima mao si alyas “John”, nagpuyo sa Sitio Tapon, Barangay Poblacion 3 sa nahisgutang siyudad drayber sa scooter nga motorsiklo.
Samtang ang drayber sa wing van mao si alyas “Roberto”, 52-anyos, minyo, taga Opao, Tanjay City, Negros Oriental.
Base sa imbestigasyon sa Carcar City Police Station ang motorsiklo ug wing van nagbiyahe sa pareho nga direksiyon.
Gikataho nga ang motorsiklo gikan sa Lungsod sa Minglanilla paingon sa Dakbayan sa Carcar samtang ang wing van gikan sa Dakbayan sa Talisay paingon sa Lungsod sa Oslob.
Ug pag-abot diha sa lugar nga nahitaboan ang motorsiklo giingong nisuway og overtake sa wing van sa pikas habig sa highway apan giingong wala makarkulo sa biktima ang pag-overtake hinungdan nga nipreno kini ug nabangga ngadto sa wing van.
Nabuwag ang drayber sa motorsiklo ug nalatayan kini sa ligid sa likod nga bahin sa wing van.
Daling gidala ang biktima diha sa Cebu Provincial Hospital-Carcar City apan gideklara kini nga patay na nga naabot sa maong tambalanan. BDB BANAT NEWS
- Latest
