Wanted sa kasong murder nasikop sa Bohol

CEBU, Philippines — Nadakpan sa mga operatiba sa Anda Municipal Police Station sa Bohol Police Provincial Office(BPPO) ang 37-anyos nga lalake nga wanted sa kasong murder human sa 18 ka tuig nga pagtago-tago.

Ang akusado mao si alyas Arthur, 37 anyos, minyo ug taga Purok 3, Barangay Bacong, Lungsod sa Anda.

Gidakop ang suspetsado pinasikad sa warrant of arrest sa kasong murder nga gi-issue ni Hon. Jorge Espinal, Presiding Judge sa 7th Judicial Region, Regional Trial Court, Branch 51, Carmen Bohol nga gi-issue Marso 10, 2025 ug wala'y piyansa nga gitugot.

Nahitabo ang kasong pagpatay niadtong Disyembre 3, 2007 diin 18 anyos pa ang suspetsado ug iyang kababata ang biktima ug nilayas dayon kini ug didto nagtago-tago sa Luzon.

Apan gumikan kay nagpadayon man ang pagpanguha og impormasyon sa kapolisan ingon man surveillance nahibaw-an nga niadtong nibalik kini sa ilang lugar sa Bohol didto gi-implementar ang warrant of arrest.

“Kini nga pagdakop nagpamatuod sa wala’y paglubad nga paningkamot sa atong kapolisan sa pagdala sa hustisya. Dako ang among pasalamat sa Anda MPS ug sa tibook team nga naningkamot nga malampuson kining operasyon. Usa kini ka pahimangno sa tanang naglikay sa balaod, dili kamo makalikay hangtod nga makab-ot ang hustisya", sigon ni Police Colonel Arnel Banzon, Provincial Director sa Bohol Police Provincial Office.