Mga tulisan nailhan tungod sa dashcam
CEBU, Philippines — Usa ka 53-anyos nga taxi driver ang naangol gidunggab sa duha ka pasahero nga mga tulisan diay diha sa Sitio Laguna 2, Barangay Bulacao, siyudad sa Sugbo pasado alas 5 sa buntag kagahapon, Marso 15, 2025.
Ang biktima mao si Glicerio Cortez Mier, taga Barangay Vito, Lungsod sa Minglanilla.
Samtang ang mga suspek mao ang manag-uyoang sila si Ronilo ug John Lloyd Lantape, taga Barangay Bulacao ning siyudad.
Matod pa ang duha nisakay sa biktima gikan sa Pelaez Street sa Cebu City ug nagpahatod sa Sitio Laguna, Barangay Bulacao.
Pag-abot sa ngitngit nga lugar giingong kalit giatake sa duha biktima gamit ang kutsilyo ug nideklarar og tulis.
Ang usa sa mga suspek nga naglingkod sa likod sa sakyanan miluok sa liog sa biktima samtang ang usa nidunggab niya.
Sa pagkisi-kisi sa biktima nabitad niini ang kamot sa suspek nga nagdala og kutsilyo hinungdan nga natagak kini.
Gikuha sa mga suspetsado ang bag sa biktima nga dunay sulod P6,000 nga kita sa pagpamasada, apil ang pitaka nga naa iyahang driver license ug gikuha sab ang yawe sa taxi dayong sibat.
Sa pagsubay sa footage sa dash camera sa taxi, nailhan ang mga suspetsado.
Gidala sa tambalanan ang biktima samtang padayon ang hot pursuit operation sa kapulisan batok sa managsuon. (BANAT NEWS)
- Latest
