Dump truck natumba padung sa balay

CEBU, Philippines — Usa ka dump truck nga nagkarga og mga basura ang nadasmag usa ka balay ug tindahan sa Purok 1, Barangay Zaragoza, lungsod sa Aloguinsan kagahapon sa alas-5 sa buntag Biyernes, Oktubre 2, 2026.

Gikatahong nakatulog ang drayber samtang nagmaneho hinungdan nga nitipas ang truck sa dalan ug nalahus sa paril ug naigo sa balay.

Base sa inisyal nga imbestigasyon sa Aloguinsan Municipal Police Station,ang dump truck gimaneho ni Fedyboy Habasa Kilag, residente sa Gen. Climaco, Toledo City.

Kauban usab sa truck ang helper niini nga si Niño Phil Detecio Jagonoy, taga Sambag, Sangi, Toledo City.

Base sa inisyal nga imbestigasyon, giingong nakatulog si Kilag samtang nagmaneho, hinungdan nga nabangga sa balay ug variety store nga gipanag-iya sa magtiayong Robert Abellana ug Valjhun Abellana.

Human sa insidente, gidala sa mga pulis ang drayber ug truck helper ngadto sa Aloguinsan Police Station.

Gihulat ang truck owner alang sa posibleng negosasyon bahin sa kadaot nga nahimo sa mga kabtangan. Swerte hinuon nga walay nasamdan sa maong aksidente.

Padayon ang imbestigasyon sa Aloguinsan Municipal Police Station bahin sa nahitabong insidente. — /IBM (BANAT NEWS)