Duterte niatubang na sa korte

CEBU, Philippines — Gitakda alas-9 kagabii, Biyernes Marso 14 (oras dinhi sa Pilipinas) ang initial appearance hearing ni kanhi presidente Rodrigo Duterte  atubangan sa International Criminal Court diin siya basahan sa kasong gipasaka batok niya ug pahibaw-on sab siya sa iyang mga katungod ubos sa Rome Statute.

Si Duterte mitudlo kang kanhi executive secretary Salvador Medialdea isip usa sa iyahang legal counsel ug mihangyo sab kini nga pahatagan siya’g abogado gikan sa Office of Public Counsel for the Defence para motabang kaniya sa husay.

Ang Office of Public Counsel for the Defence , usa kini ka independenteng buhatan diha sa ICC nga motabang aron morepresentar sa katungod sa akusado ug sa legal team niini aron pagsiguro sa "equality of arms" sa tibuok proseso sa imbestigasyon ug sa husay.

Gilangkuban kini og mga espesyalistang abogado nga makatabang pagdepensa kang Duterte samtang nagpabiling independente ug ligdong sa ilang papel sa kaso.

"On 13 March 2025, Registry representatives visited Mr. Duterte in in relation to his initial appearance before Pre-Trial Chamber I where he indicated that he wishes to be assisted at said appearance by Mr. Medialdea," matud pa sa dokumento sa ICC.

"He also confirmed orally, to the Registry representatives, that he wishes to have the assistance of the Office of Public Counsel for the Defence for the purposes of the initial appearance in addition to Mr. Medialdea," dugang pa niini.

 “The public hearing will be broadcasted with a thirty-minute delay in order to protect any potential sensitive information,” matud pa sa upat ka pahinang dokumento nga gipagawas sa ICC.

Atol sa initial appearance hearing, beripikahon sa mga hukom ang pagkatawo sa akusado ug kun unsang pinulongan gamiton sa paghusay.

Ang Pre-Trial Chamber I, gilangkuban nilang Presiding Judge Iulia Antoanella Motoc ug mga hukom nga silang Judge Reine Adélaïde Sophie Alapini-Gansou ug Judge María del Socorro Flores Liera.

Sa pikas bahin, gihimakak sa Philippine embassy didto ang pangangkon ni Medialdea nga na-missing si Duterte diha sa ICC Detention Center.

Matud pa sa embahada, mismo si Duterte ang mipahibalo kanila nga gipaubos siya og medical check-up, ug gihatagan og medical care ug “generally fine” sa dihang ilang gitawgan niadtong Huwebes.

Tanang komunikasyon o pagbisita kang Duterte sa iyang abogado, pamilya ug opisyales sa embahada naka-rekord sa Registry sa ICC sukwahi sa pangangkon ni Medialdea nga posibleng gidala sa wala gibutyag nga dapit ang kanhi pangulo.

Ang ICC miklaro nga naa lang sa Detention Center sa Scheveningen si Duterte. Ang tigpamaba sa ICC nga si Fadi El Abdallah: “When a suspect arrives in ICC custody, the Court as standard practice takes measures to protect the health and well-being of the suspect.” Siya midugang nga importante sa ICC ang pagrespeto sa integridad sa proseso sa hudikatura.

Kagahapong adlawa sab niabot na didto si Bise Presidente Sara Duterte, Senador Robinhood Padilla u gang kontrobersiyal nga kanhi tigpamaba ni Duterte nga si Atty. Harry Roque kinsa gipangita sab sa balaod dinhi sa Pilipinas tungod sa  qualified human trafficking.

Gimando sa House of Representatives nga i-detain si Roque human gi cite in contempt atol sa congressional probe bahin sa POGO. Apan wala na kini igkita pa ug basis a rekord sa Bureau of Immigration nakagawas na kini sa nasud.—Gikan sa One News ug Philstar.com/IBM BANAT NEWS