Baricuatro: Mag-unsa ang kadato kun daghan gihapon ang pobre?

CEBU, Philippines — Pag-uswag sa pag-atiman sa panglawas, pagpausbaw sa ekonomiya, ug pagpalig-on sa edukasyon—mao kini ang pipila sa mga nag-unang prayoridad ni gubernatorial candidate Pamela “Pam” Baricuatro sa iyang pagdagan pagka-gobernador sa Probinsya Sugbo sa umaabot nga piniliay sa Mayo 2025.

Atol sa episode sa Know Your Candidate sa The Freeman ug Banat News kagahapon, Marso 13, gibutyag ni Baricuatro ang iyang mga plano alang sa probinsya ug ang hinungdan sa iyang pagdagan pagka-gobernador.

Lumad nga taga Pinamungajan, si Baricuatro usa ka philanthropist kansang adbokasiya mao ang pakigbatok sa kagutom ug seguridad sa pagkaon.

Gitukod niya ang Cebu Food Bank nga gidumala sa iyang foundation nga Simplyshare Foundation Inc. nga maoy labing unang food bank sa Sugbo ug Visayas, nga nangapud-apod sa surplus nga pagkaon  ngadto sa mga nanginahanglan.

Ang iyang kasinatian isip usa ka flight stewardess nag-expose kaniya sa grabeng pag-usik-usik sa pagkaon, nga nakadasig niya sa pagsulbad sa kagutom sa Sugbo.

Nahimo siyang miyembro sa Global Food Banking Network nga nakatabang kaniya sa pag-establisar og structured food banking system.

Ang desisyon ni Baricuatro nga modagan pagka-gobernador naggumikan sa iyang kabalaka sa taas nga poverty rate sa Sugbo.

Iyang gikutlo ang datus gikan sa Philippine Statistics Authority, nga nagbutyag nga sa 2.56 milyones ka pamilya nga anaa sa kakabos, 1.72 milyones ang gikan sa lalawigan sa Sugbo.

Matud pa niya dunay koneksyon ang kakabos ug kurapsyon base sa pagtuon sa International Monetary Fund. Kun daghan gani ang kabus, siguradong grabe ang kurapsyon nga nagpaluyo niini.

Si Baricuatro kinsa dunay background sa public leadership gikan sa Harvard Kennedy School, determinado nga makahimo og kausaban sa Sugbo.

Usa sa iyang gustong palambuon mao ang bahin sa panglawas sa publiko, kalamboan sa ekonomiya, ug edukasyon, mas sayon nga proseso sa negosyo, ug job-focused training programs nga makahatag og panginabuhian sa mga Sugbuanon.

Wala niya palabya kining pagtawag sa Sugbu nga pinaka-adunahang probinsya apan mao say dunay pinakadaghan og kabus nga probinsya tibuok nasud.

“Ang importante nga ang katawhan, ang Cebuano di mapasagdaan. Unsaon mana nato nga richest province ta, daghang nagkalisod, nabiyaan ang daghang mga Cebuanos?... So it does not matter kung richest ta or second richest ta, ang importante ang quality of life sa mga Cebuano," matud ni Baricuatro.   IBM BANAT NEWS