Mga nasunogan sa Mambaling posibleng ibalhin sa Inayawan

CEBU, Philippines — Gilantaw karon nga ang Barangay Inayawan, Dakbayan sa Sugbo maoy posibleng balhinan sa mga biktima sa sunog sa Barangay Mambaling nga nahitabo niadtong Marso 2, 2025. 

Base sa datus sa Department of Social Welfare and Services (DSWS) niabot ngadto sa 195 ka pamilya ang apektado sa maong sunog ug kasamtangang nagpasilong sa Viking gym sa Barangay Mambaling.

Kasagaran sa mga nasunogan mao ang naggikan sa Badjao community.

Matud ni Konsehal Jerry Guardo, chairman sa Task Force Pabahay sa kagamhanan sa Dakbayan sa Sugbo nga gikonsidera nila ang maong dapit gumikan kay duol kini sa dagat ug base sa ilang nakuhang yangungo sa mga Badjao nga mas pabor nila ang duol sa dagat tungod sa ilang panginabuhian.

Ang gisugyot nga potential nga relocation site sa City Planning and Development Office mao nahimutang atbang sa landfill nga nakakonektar sa South Road Properties (SRP).

“All these factors—city planning, engineering, and environmental aspects—must be incorporated into the proposal”, matud ni Guardo.

Ipresentar kini ni Guardo ngadto kang Mayor Raymond Alvin Garcia sunod semana ug kong ma-aprobahan iimplementar dayon kini.

Si Guardo nagkanayon nga adunay duha ka technical working group nga nakatahas nga motan-aw sa relocation site nga maoy motutok sa engineering ug environmental nga aspeto. Gibutyag ni Guardo nga andam usab moabag ang kagamhanan sa Malaysia aron matukoran og stilt houses ang mga nahisgutang nasunogan. BDB BANAT NEWS