Babaye nasampak sa flyover, patay

CEBU, Philippines — Patay ang usa ka 25-anyos nga babaye human nabangga ang gimanehong motorsiklo sa kilid sa flyover sa Governor Cuenco Avenue, Barangay Luz, siyudad sa Sugbo alas-3 kagahapon sa kaadlawon, Oktubre 29, 2024.

Ang biktima mao si Vanessa Fabroa Arellano, 25, taga Cebu City ug nag maneho sa motorsiklo nga Honda Click.

Sa imbestigasyon sa Traffic Enforcement Unit sa Cebu City Police Office , dunay nakakita sa hitabo nga ang biktima kusog kaayo nakapadagan sa iyahang motorsiklo pagsaka sa flyover. 

Apan nawagtangan kini og kontrol sa motorsiklo  ug nabangga sa kilid sa flyover ug nalabay sa karsada. Nakaangkon og grabeng kadaot sa lawas ug ulo ang biktima.

"We’ll check pa asa ni siya gikan. Kusog ra gyud iyaha speed,"sigon ni Police Lieutenant Colonel Miguel Andez, hepe sa Traffic Enforcement Unit sa Cebu City Police Office.

Gidala pa sa Cebu City Medical Center ang biktima apan gideklarar kining dead-on-arrival.

Sa pikas bahin, nalahos sa kanal ug nangalabay ang magtiayong sakay og motorsiklo diha sa National Highway sa Barangay Cogonwest sa Lungsod sa Carmen.

Ang bana nga si Ruel Perpetua Rosal, 43, maoy nagmaneho sa motor ug angkas ang asawa nga si Margie , 44,  parehong nagpuyo sa Fatima sa Lungsod sa Consolacion.

Sa imbestigasyon sa kapolisan kusog ang dagan sa motor apan nalahos kini sa kanal hinungdan sa pagkalamba sa magtiayon.

Gidala ang duha sa Cebu Provincial Hospital sa Siyudad sa Danao apan nakabsan sa kinabuhi ang bana.

Samtang siyam ka tawo ang nangaangol human ang ilang gisakyang multicab nalimbuwad samtang nagbiyahe sa Purok Maribago, Barangay Jaclupan, Dakbayan sa Talisay.

Unom ka mga hamtong  ug tulo ka bata ang matud pa sakay sa maong multicab padung sa Barangay Tabunok. Apan nasuta nga ang mga pasahero mga nang hitch ra sa drayber.

Gikataho nga nakatagpilaw ang drayber samtang nagmaneho maong napunta kini sa koral ug giharos ang nakaparada nga motorsiklo.

Dali nga gidala sa tambalanan ang mga sakay sa multicab nga nakaangkonog minor injuries.— Romeo T.  Limpangog ug Gabriel Bonjoc/IBM BANAT NEWS