CPA posibleng magbutang og shuttle service sa pantalan

CEBU, Philippines — Gikonsiderar karon sa Cebu Port Authority CPA ang pagbutang og shuttle service diha sa pantalan subay sa hangyo sa Cebu City Council, ilabi na sa pagdili sa taxi nga makasulod sa pantalan.

Ang CPA nipadayag nga gitugotan na kaniadto ang linya sa mga taxi sulod sa pantalan apan karon dili na mahimo tungod kay nakamugna kini og daghan issues ug concerns.

Sa pagka karon ang CPA naghatag ug shuttle services para lang sa outbound passengers gikan sa terminal padulong sa ilang barko.

Ang CPA Management komitido sa paghatag ug mas kombenyente, barato, kasaligan, episyente, ug luwas nga mga serbisyo, dili lamang sa pagtubag sa mga panginahanglan sa mga Senior Citizens, PWDs, mabdos ug mga pasahero nga nagbiyahe uban sa mga masuso ug gagmay nga mga bata apan usab sa tanang tiggamit sa pantalan.

Samtang ang chairman ug CEO sa Oriental Port and Allied Services Corporation Atty. Tomas Riveral nipasigarbo usab sa iyang mga nahimo isip presidente sa OPASCOR ug mapasalamaton sa mga proyekto nga katambayayong ang CPA.

Matud pa ni Riveral sa iyang paglingkod sa OPASCOR limited ra kaayo ang ilang resources ug pipila sa company equipment modernization pero sa iyang pag asumer isip presidente diha na nisaka pag ayo ang OPASCOR ug nahimong moderno ang ilang operations.

Samtang sa facilities dugang pa ni Riveral aduna silay Cebu Bulk Grain Terminal usa kini ka P250M facility nga nahimutang sulod sa Cebu International Port diin usa kini ka joint project sa Cebu Port Authority ug OPASCOR.

Aduna usab reefer facility sa CIP diin 513 ka reefer outlets nga gipahimutang sa mga strategic location aron sa pag facilitate sa plugging/unplugging ug monitoring sa container temperature sa mga sensitive nga cargoes.

Dugang pa ni Riveral aduna silay finger pier nga migasto og usa ka bilyon ka pesos nga gihimo uban sa Cebu Port Authority aron sa pagpasaka sa CIP operational capacity ug aduna usab CIP operations center nga tulo ka andana nga nagsilbing headquarters of operations.