Ordinansa hon nga wad-on ang realty tax clearance giduso

CEBU, Philippines — Ordinansahon giduso sa siyudad sa Mandaue alang sa tinguha nga temporaryong pagwagtang sa realty tax clearance isip usa sa mga rekisito alang sa pagkuha og business permits. Ang maong ordinansahon giduso ni Konsehal Marie Immalin Cortes-Zafra ug ipalabang sa 3rd ug final reading sa regular session sa konseho karong Lunes, Septiyembre 23, 2024.

Si City Treasurer Regal Oliva nga nahinabi sa mga tigbalita sa “Storya Ta! A Move to Good Governance and Transparency” forum miingon nga kining maong pamaagi maghatag og kahigayonan alang niadtong dugay mobayad sa buhis sa ilang patigayon.

“Dili tanan nga naghimo og negosyo mga real property owner tungod kay ang pipila niini kanila mga nag-abang lamang ug dili usab makiangayon nga ang realty property owners ang pahamtangan,"ni Atty Oliva pa.   Sa Mandaue City adunay natala nga 16,000 ka mga registered businesses ug kadaghanan kanila nag-operate isip wholesale ug retail, transportation, real estate, ug manufacturing.

Sa maong gidaghanon sa mga patigayon ang 13,494 ang giisip nga micro businesses; 1,677 ang small businesses; 409, medium-sized businesses; ug 68, niini giila na nga mga dagkong patigayon nga nahimutang sa dakbayan sa Mandaue.

Sa laing bahin ang Filipino Homes ang usa sa kinadak-ang network sa real estate sa Pilipinas mo-host sa National Real Estate Convention 2024 diin magtigom ang kapin sa 600 ka delegado uban sa top 30 developers gikan sa tibuok nasud.

Ang kalihukan ipahigayon sa Nustar Resort and Casino sa Octobre 20-21,2024.

Kini magsaulog sa kalampusan sa mga propesyonal sa real estate ug partner nga developer sa propriedad ug sa samang higayon nagpasiugda sa mahinungdanong mga kalamboan sa industriya sa real estate.

Ang convention magpakita sa usa ka adlaw nga fellowship, networking ug knowledge-sharing nga magpalig-on sa Filipino Homes Community.

Matud pa ni Anthony Gerard Leuterio, founder ug CEO sa Filipino Homes, ang maong kalihukan agi usab kini og pagsaulog sa mga nahimo ilang agent ug pag equip kanila sa mga bag-ong strategies. (BANAT NEWS)