Rama miawhag sa mga mag-uuma pagduol kaniya

CEBU, Philippines — Giawhag ang tanang mga mag-uuma sa kabukiran sa Dakbayan sa Sugbu nga naapektahan na og maayo sa El Niño ug wala pa nakadawat og tabang gikan sa siyudad sa pagduol sa buhatan ni Mayor Michael Rama.

Kini human nga ang Konseho niawhag sa pagtangtang kang City Agriculturist Joey Baclayon tungod sa matud pa kapakyas niya pag-aksyon aning gisagubang mga krisis sa mga mag-uuma.

Atol sa regular nga sesyon sa Konseho niadtong Abril 4, si Konsehal Pastor Alcover mitambag kang Baclayon sa pagkanaog sa pwesto aron masalbar ang mga mag-uuma ingon man ang liderato sa mayor.

Apan si Rama dili mosugot ug gimandoan hinuon si Baclayon pagtubag sa mga pasangil batok sa naulahi.

Matud ni Rama, gawas kaniya, dili sab uyon ang ubang mga department heads sa gustong mahitabo ni Alcover.

“I even consulted the 27 department heads. Unsa man mo? Dissatisfied ba mo ni Joey Baclayon because I can remove him? Unanimously, they said no. So I retained him but it came with a warning,” matud sa mayor sa regular niyang programa City Sugboanon channel.

Hinuon giawhag ni Rama ang mga mag-uuma nga direktang moduol kaniya kun duna silay problema tungod sa El Niño.

“Abli na ang opisina sa mayor, adtoa ko didto,” panawagan pa ni Rama. Sa pikas bahin, si Baclayon mihagit kang Alcover nga barugan ug mopresentar og mga kamatuoran ug ibutyag kun kinsa ni nga mag-uuma ang namasangil kaniya nga wala siyay gibuhat.

“Kinsa man na mag-uumaha nga iyang gipang-ingon ug gipaminaw? Mag-uuma pud nato nga dili pud tinuod pud nga mag-uuma?,” matud pang Baclayon City’s News team.

Gikwestyon sab ni Baclayon ang mga alegasyong wala siyay gibuhat pagtabang sa mga mag-uuma tungod kay wala man siyay nadawat nga reklamo diha sa iyang buhatan gikan sa 10,970 rehistradong mag-uuma. “Asa man ang tinuod nga damages kung naa man ganiy damage o wala na-address nga problema sa mag-uuma, diba wala?” dugang pang Baclayon.

Si Baclayon miingon nga bisan wala pa moabot ang El Niño, nangandam na og sayo ang CAD. Matud sa opisyal, bisan wala pa ang katalagman nitabang na ang siyudad sa mga mag-uuma.

Sumala pa niya, ang mga mag-uuma maoy nidesisyon nga ini og labay nalang sa ting-init ug sa El Niño sila mobalik og pananom.

Ang CAD miorganisar sa mga maguuma ug gibahin sila ngadto sa tulo ka grupo aron mapasayon ang pagtabang kanila, naghimo sab sila og caravan aron paghatag kanila og mga kasayoran bahin sa El Niño, nitabang sab sila nga mapa rehistro sa Philippine Crop Insurance Corp. ang mga maguuma ug mga namuhi og hayop.

 Nakigalayon na sab ang CAD sa National Irrigation Administration aron matabangan ang mga mag-uuma sa patubig s umahan, mihatag na sab sila og mga hose, drums ug mga tanke sa tubig aron makatigum og tubig ang mga maguuma.(BANAT NEWS)