Babaye naninda og balot patay human naguroy sa wing van

CEBU, Philippines — Patay ang usa ka babaye nga manindahay og balot human naguroy sa wing van nga adunay kargang mga bugas dihang nibangga kini sa terminal sa Hagnaya Port, Barangay Hagnaya, Lungsod sa San Remigio niadtong Martes sa tungang gabii.

Ang biktima mao si Jennie Mandado, 44-anyos, nagpuyo sa Purok Agbati, Barangay Hagnaya sa maong lungsod.

Samtang ang drayber sa truck mao si Arsenio Mansueto Lawan, 38-anyos, taga Sitio Combado, Barangay Ticad, Lungsod sa Bantayan.

Base sa imbestigasyon sa San Remigio Police Station padulong mosakay ang wing van sa barko paingon ngadto sa Bantayan.

Samtang nagdagan giingong kalit nga nibuto ang brake ug dihang nakabantay ang drayber gitawag niya ang iyahang kauban sa truck nga mokuha og ibangil sa ligid.

Apan tungod kay dulhugon ug bug-at ang mga gikargang bugas wala na malubag sa drayber ang truck hinungdan nga gidaro niini ang ubang mga sakyanan nga gilangkuban sa Isuzu elf, color blue nga Mitsubishi Wing Van Truck, brown nga Toyota Fortuner, color red nga Rusi motorcycle ug color blue nga Suzuki Smash.

Nilahos pa gyud ang wing van sa seaport building hinungdan nga naguroy sa truck ang biktima ug miresulta sa pagkaputol sa wala nga paa human kini napisat. Sa wala pa mahitabo ang maong aksidente ang biktima naglingkod kini diha sa waiting area sa atubangan nga bahin sa Hagnaya Port naninda og balot.

Daling gidala ngadto sa tambalanan ang biktima apan gideklara kini nga patay na nga naabot sa tambalanan.

Kasong reckless imprudence resulting in homicide and multiple damage to property ang kasong ipasaka batok sa drayber sa truck. BDB BANAT NEWS