E-bike higpit nang i-ban sa kadalanan sa Mandaue

CEBU, Philippines — Higpit na ang pag-ban sa mga e-bike diha sa kadalanan sa Siyudad sa Mandaue human nagkauyon ang traffic board atol sa ilang panagtigom nga gihimo.

Si Hylle Retuya, pangulo sa Traffic Enforcement Agency of Mandue (TEAM) nagkanayon nga nahukman ang paghimo sa maong lakang tungod sa namatikdan nga pagdagsang sa maong matang sa mga sakyanan niining panahona. Sugdan sa pagpatuman ang pagdili na sa pagpadagan sa mga e-bike sa kadalanan human usab sa usa ka semana nilang pagpakatap  sa kasayoran kalabot sa maong lakang sa kagamhanan sa siyudad.

Gipasabot ni Retuya nga ang mga e-bike walay prangkisa, walay rehistro ug walay lisensiya ang mga drayber nga nagmaneho niini.

Matud ni Retuya nga sukwahi kini sa mga tricycle nga namasahero nga adunay mga prangkisa ug adunay lisensiya ang drayber nga nagmaneho.

Dugang ni Retuya nga ang mga e-bike nga madakpan sa mga traffic enforcer isulod kini sa impounding area sa siyudad. BDB BANAT NEWS