CT-TODA ug clearing team nag-alayon paghawan sa sidewalk

CEBU, Philippines — Ang pangulo sa City of Talisay-Traffic Operations and Development Authority (CT-TODA) Jonathan "Joy" Tumulak padayon ang pakig-alayon karon sa clearing team.

Matud ni Tumulak nga nakig-alayon sila sa clearing team aron mopahimangno nang daan sa mga vendor nga inig abot o tungtong dayon sa buwan sa Disyembre ilang paningkamotan nga wala na gayu’y makaali sa sidewalk.  Si Tumulak nagkanayon nga sa pagka karon aduna nay mga on-going clearing aron mopahimangno nga mopadaplin ang mga vendor ilabi na diha dapit gikan sa Barangay Tabunok ngadto paingon sa Bulacao.

Gibutyag ni Tumulak nga lakip usab nilang gitutokan ang mga gagmay nga kadalanan sama diha sa mga barangay sa San Roque, Tangke ug Cansojong nga walay mag-ali-ali sa mga kadalanan ug magpataka og parking.

Dugang ni Tumulak nga nakig-alayon sila sa mga barangay kapitan aron hatagan sila og higayon nga makighinabi sa ilang mga tawo samtang dili pa sila mangsakmit sa mga nagpataka og parking sa mga kadalanan sama sa mga sakyanan, e-bike ug uban pa nga maghatag unya og kalisod ilabi na panahon nga adunay emerhensiya. BDB BANAT NEWS