Mga fire responders gihatagan og dugang benepisyo

CEBU, Philippines — Ang pagpanghatag sa maong benepisyo sugdan na kini sunod tuig.

Sa taho sa Cebu City Public Information Office, ubos sa pagdumala ni Cebu City Mayor Raymond Alvin Garcia, gipausbawan usab ang honorarium sa matag fire responder gikan sa P3,000, nahimo na kining P5,000.

Dugang pahalipay nga gihatag sa mayor ngadto sa mga fire responders atol sa panagtapok sa Cebu City Sports Center mao ang taglima ka kilo nga bugas isip sayo nga pinaskohan gikan kang Garcia.

Mipasabot ang mayor nga ang pagbubo og mga benepisyo alang sa mga fire responders mao nga aron motaas ang moral niini ug mahatagan sila sa ilang mga gikinahanglan.

Dugang pa ni Garcia nga dili sab siya ganahan nga mabalik ang nahitabo kaniadto nga adunay upat ka empleyado sa City Assessor’s Office nga wala ma sweldohi sulod sa 10 ka buwan ubos sa administrasyon ni dismissed mayor Michael Rama diin mao kini ang hinungdan sa pagkasuspenso niini sa katungdanan.

Gawas sa maong rason, mapasalamaton sab ang mayor ngadto sa mga fire responders tungod sa walay puas nga pagpakita og pagsakripisyo ug pagpanerbisyo sa katawhan sa siyudad ilabi na gyud panahon sa kalamidad.  MEL BANAT NEWS