Bikini open gidili gihapon sa Sugbu

CEBU, Philippines — Giawhag ni bokal Red Duterte ang mga local government units nga dili gyud togutan ang mga events o kalihokan nga posibleng adunay mga law-ay nga himoon karong Semana Santa.

Matud ni Dutete nga sila sa Kapitolyo mag-monitor sa maong mga kalihokan pinaagi sa pag-coordinate sa mga LGUs aron mapugngan ang mga law-ay nga kalihokan.

Kahinumdoman nga sa nanglabay nga mga katuigan, sa panahon sa tingbakasyon daghang mga resorts sa nagkadaiyang lugar sa Sugbu ang mopasundayag og mga indigay sa kaanyag ug kagwapo nga gitawag og Bikini Open nga usa sa nakapadugok sa mga bisita.

Apan human nga dunay mga nangreklamo tungod kay ang uban niini gihulagway nila nga immoral gipahunong kini sa probinsya.

Nasayod si Duterte nga karon nga nagsugod na ang summer o tig-init daghan ang modagsa sa mga tourism destinations sama sa Camotes Island ug Bantayan island, ug kini usa ka "economic opportunity" sa mga lokal apan kinahanglan sigurohon nga samtang anaa sa bakasyon morespeto gihapon sa pag-obserbar sa Semana Santa.

"We also have to remember nga we are celebrating holy week and maybe we just have to strike a balance bitaw -- economic activity and religious pud," matud ni Duterte. – IBM BANAT NEWS