Skywalk sa Fuente Osmeña gisugdan na og tang-tang

CEBU, Philippines — Ang Cebu City Transportation Office nagpahigayon og emergency road closure kagahapon tungod sa pagtangtang sa skywalk diha sa Fuente Osmeña Circle sa Osmeña Boulevard, Dakbayan sa Sugbo.

Ug gumikan sa presensiya sa nangliki nga semento ug nangatagak nga debris gikan sa Fuente skywalk samtang ang contractor nanangtang sa atop og railings ang RMA mopahigayon og temporaryo nga pagsira sa portion sa Osmeña Boulevard gikan sa Fuente Osmeña hangtud na sa Arlington Pond Street.

Sa mga motorista nga padulong sa downtown Colon area gikan sa Osmeña Boulevard ug B. Rodriguez Street adto kini moagi sa F. Ramos Street, samtang kadtong mopadalong sa Jones Avenue moliko sila sa tuo paingon sa Arlington Pond Street, liko sa wala paingon sa Osmeña Boulevard o naila kanhi nga Jones Avenue.

Ang mopadulong sa dalan Colon adto sila moagi sa Jonquera Street.

Gipahibalo sa CCTO nga tanang motorista nga mopadulong sa uptown area sama sa Capitol ug B. Rodriguez gikan sa Osmeña Boulevard moliko sa tuo ngadto sa Arlington Pond Street, liko sa wala ngadto sa F. Ramos Street ug liko sa tuo ngadto sa Osmeña Boulevard.

Ang Road Management Authority (RMA) niawhag sa publiko sa ilang pagsabot ug pasensiya sa gihimo nga emergency closure alang sa kaluwasan sa publiko.

Giawahg ang mga motorista nga moagi sa mga alternatibo nga dalan o mosayo og lakaw sa ilang gikatakda nga oras sa trabaho aron dili sila malangay diha sa kadalanan tungod sa gihimo nga emergency closure. Subay niini, managlahi ang reaksiyon sa mga tawo kinsa nahasol sa ilang paglakaw og layo diin ang uban nanga-late na sa trabaho ug eskwelahan.

Sa iyang bahin, si Mayor Michael Rama nagkanayon nga ang pagtang-tang sa usa sa mga skywalk kinahanglang himuon sa gabii human sa peak hours.

Si Rama nipadayag sa maong kamandoan human siya nakadawat og reklamo sa mga motorista ug sumasakay gumikan sa grabeng kahuot sa trapiko human gisugdan sa mga proponent sa Cebu Bus Rapid Transit sa pagtang-tang sa skywalk. (BANAT NEWS)