Mga billboard sa Cebu City ipasusi ang kalig-on

CEBU, Philippines — Nagkadaiyang ahensiya sa kagamhanan sa Dakbayan sa Sugbo ang gipatawag aron sa pagsuta sa kalig-on sa mga billboard nga anaa sa siyudad base kini sa resolusyon nga giduso ni Cebu City Councilor Rey Gealon.

Matud ni Gealon nga aduna siya’y nabantayan nga mga billboard sa siyudad nga nanginahanglan pa og regulation sa gobiyerno.

“While most seem structurally sound, others are on the verge of collapse. Angle bars and metal rods, among other materials used, are thin and compromising which pose danger to lives and limbs of pedestrians and motorists alike”, matud ni Gealon.

Giklaro niya nga kinahanglang tuki-on ang polisiya sa pagtukod sa mga billboard aron masuta ang structural integrity ug ang lokasyon niini aron luwas kini sa publiko.

Si Gealon nagkanayon nga importante nga ang mga billboard dili makabalda sa panan-aw sa mga drayber sa kadalanan ug sa mga panan-aw sa mga turista sa mga maanindot nga talan-awon sa dakbayan.

Base sa resolusyon ni Gealon nagkanayon kini nga pipila sa mga istraktura nga nahimutangan sa mga billboar dugay na nga gitaod.

“Its structural integrity could be affected by different factors, such as the weather, used materials, or manner of installation”, ni Gealon pa.

Mihangyo na usab si Gealon sa Cebu City Disaster Risk Reduction and Management Office (CCDRRMO) ug sa Office of the Building Official (OBO) sa pagpahigayon og ocular inspection sa kalig-on sa mga billboard aron pagsuta kong dili ba kini delikado ngadto sa publiko.  Niduso na usab og laing resolusyon si Gealon sa paglakip sa mga lightemitting diode (LED) billboard o digital billboards tungod kay posible usab kini nga makabalda sa panan-aw sa mga motorista. (BANAT NEWS)