Medical mission sa United Skeptrons gihimo sa Talisay
CEBU, Philippines — Gatusan ka mga nanimuyo sa Barangay Tangke, Dakbayan sa Talisay ang nakabenipisyo sa usa ka adlaw nga Medical, Optical and Circumcision Mission nga gihalad sa United Skeptrons of Talisay, kagahapon, Domingo sulod sa Tangke National High School.
200 ka bata ang nakaapil sa libre nga tuli, aduna pay gatusan ang naka dawat sa libre nga eyeglasses bata man ug dagko, ug daghan usab ang nagpa check-up sa panglawas.
Dili mominos sa 30 ka mga doctors ug nurses ang niapil sa maong kalihukan.
Matud pa ni Michael Magale, Chairman sa Talisay City Skeptron Alumni nga tumong sa ilang kalihukan mao ang pagtabang sa katilingban ug makig-alayon sa gobiyerno aron maghatud sa serbisyong medical.
Napili nila ang Tangke, tungod kay anaa kini sa layo nga dapit sa Talisay ug gusto usab nila ipaambit ang mga serbisyo sa mga nanimuyo sa maong barangay.
Ang taga Tangke maoy unang gihatagan sa maong serbisyo ug kung adunay sobra mahimo maka apil ang mga kasikbit nga dapit.
Gitug-an ni Magale, aduna pa silay daghang plano ug proyekto para sa mga Talisaynon nga ila pa nga ipaambit sa umaabot nga mga adlaw.
Mapasalamaton usab si Magale sa tanan nilang mga partners ug volunteers sa kalamposan sa ilang kalihukan diin daghan ang nakapahimulos sa mga serbisyo nga gitak-opan Domingo sa hapon. —/MEL (BANAT NEWS)
- Latest
