Deliberasyon alang sa drug clearing sa 11 ka brgy gisugdan na
CEBU, Philippines — Gisugdan na sa Cebu City Police Office (CCPO) ang deliberation sa 11 ka barangay sa siyudad nga posibleng madeklarar nga drug cleared.
Matud ni Police Lt. Col. Janette Rafter, Deputy City Director for Operations sa CCPO tabangan nila ang maong mga barangay sa ilang gikinahanglan nga rekisitos aron madeklarar nga drug free. Suma pa ni Lt. Col. Rafter ang Community Affairs Division ubos sa pamunuan ni Police Lt. Col.
Albert Quilitorio mohimo og oversight meeting matag semana uban ang presensiya sa PDEA, COSAP, barangay officials ug station concern aron magiyahan ang mga barangay alang sa drug clearing.
Dugang pa ni Rafter nga sa 11 barangay, tulo niini ang dako ang posibilidad nga ma deklarar nga drug cleared ug duna lay mga proseso nga gihimo sama sa renewal sa documents ug uban pa.
Giklaro ni Rafter nga usa sa tumong sa drug clearing aron matabangan ang mga drug users nga andam magbag-o.
Samtang nasikop ang 54anyos nga ginang atol sa buy-bust operation sa Sawang Calero Police Station niadtong Martes.
Ang nasikop naila nga si Grace Cuizon, residente sa Barangay Sawang Calero ning dakbayan.
Nasakmit gikan kaniya ang mga pinutos sa ginadili nga drugas ug ang buy bust money. — Rowena D. Capistrano (BANAT NEWS)
- Latest
