Luna nga gitukoran og ospital, mga buhatan sa gobiyerno iyaha sa probinsiya

CEBU, Philippines — Gitataw ni Gobernador Gwendolyn Garcia nga ang Probinsiya sa Sugbo mao ang tag-iya sa 25 ka ektarya nga luna nga gitukoran sa Eversley Childs Sanitarium ug ubang government agencies diha sa Barangay Jagobiao, Dakbayan sa Mandaue.

Kini human nga giingong ang kadagkoan sa maong pasilidad wala moila sa Kapitolyo nga maoy tag-iya sa maong luna. Si Garcia nagkanayon nga ang maong luna gidonar sa Archdiocese of Cebu ngadto sa Probinsiya sa Sugbo niadtong tuig 1930 diin niadtong higayona ang Archdiocese sa Sugbo ubos sa pagdumala ni kanhi Cebu bishop Juan Gorordo.

Niadtong higayona usab ang Kapitolyo ubos usab sa administrasyon ni kanhi gobernador Mariano Jesus Cuenco.

Gipakita sa opisyales sa Kapitolyo ang deed of donation ug deed of acceptance sa maong luna.

Si Garcia nitataw nga walay papahawon ang Kapitolyo sa maong lugar buot lang niya nga maila nga ang probinsiya ang tag-iya sa maong luna.

Si Garcia niluwat sa maong pamahayag human giingong nabalaka ang mga nag- okupar sa maong luna nga pahawaon.

Kini human giingong nipadala og letter to vacate ang Provincial Legal Office sa mga concerned agencies sama sa Eversely, Food and Drug Administration, Barangay Jagobiao hall ug uban pang ukopante.

“Why am I fighting for this? Well, there is clear evidence that (the property) rightfully belongs to Cebu Province… Di na ako, sa probinsiya na”, matud ni Garcia.

"Wala mi papahawaon kong moangkon lang sa lehitimo nga katungod sa Probinsiya sa Sugbo nianang maong yutaa. Pangitaan pa og paagi nga mahimong lehitimo ang inyong pag-ukopar ana diha nga yuta (We will even find ways to make your occupation on our lot legitimate", dugang ni Garcia. —BDB (BANATNEWS)