Animal Rescue Center planong tukoron sa Cebu City
CEBU, Philippines — Si Cebu City Councilor Pastor “Jun” Alcover, Jr. nisugyot og ordinansahon nga magmugna sa Cebu City Wildlife Rescue, Conservation, and Protection Facility (CCWRCPF).
Ang gisugyot nga lakang gi-refer ngadto sa Committee on Laws, Ordinances, and Styling, ingon man sa Committee on Animal Welfare alang sa dugang pagtoon.
“The creation of CCWRCPF will answer the necessity of having a facility that will shelter wildlife, promote wildlife research, wildlife education, or other intents similar thereof,” kabahin sa unod sa maong ordinansahon.
Ang Seksyon 4 nagpadayag nga ang CCWRCPF kay matawag nga rescue center alang sa endangered species, critically endangered species, endemic species, exotic species, threatened species, vulnerable species o indigenous wildlife nga gibihag o gi-turn over sa concern citizens, non-government organizations, ug uban pa.
Usa pud kini nga lugar nga mahimong bisitahon sa mga estudyante, turista o researchers . Kini pagadumalahon sa Department of Veterinary Medicine and Fisheries (DVMF).
Ang DVMF, nga gipangulohan sa City Veterinarian o ang gitudlo nga officer-in-charge, gitugutan sa pagdetalye, pag-reassign o pagtudlo sa mga indibidwal ubos sa kasamtangan nga iskedyul sa mga personahe niini, regular man o kaswal nga plantilla alang sa pagdumala sa maong pasilidad.
Tugotan pud ang CCWRCPF nga mohimo og kolaborasyon sa ubang ahensya sa gobyerno alang sa pagluwas, pagkonserba o pagpanalipod sa wildlife ubos sa hurisdiksyon sa dakbayan sa Sugbo.
Mahimo usab kini nga mosulod sa usa ka kasabutan, nga girepresentahan sa Mayor nga may kalambigitan sa kustodiya o pag-atiman sa na-rescue nga wildlife sa Protected Areas and Wildlife Bureau (PAWB) sa Department of Environment and Natural Resources (DENR) o uban pang ahensya sa gobyerno nga adunay susamang gimbuhaton. —/IBM (BANAT NEWS)
- Latest
