Lola nakuhaag P7.5 milyones Shabu
MANILA, Philippines — Dul-an sa P7.5 milyones nga balor sa ilegal nga drugas ang nasakmit gikan sa usa ka babayeng senior citizen sa gipahigayon nga buybust operation sa Provincial Intelligence Unit ( PIU CPPO) pinangulohan ni Police Major Joey Bicoy alas 8:45 Biyernes sa Gabii sa Brgy. Poblacion Oriental, Lungsod sa Consolacion.
Giila sa kapolisan ang ilang dinakpan nga mao si Wennie Delos Santos Chow, a.k.a “Nanay”, 62, residente sa Brgy. Subayon, Toledo City nga gikonsiderar nga High Value Individual (HVI) Regional Priority Top Ten Drug Personality. Apan si Chow nangangkon nga igo lang siya gisugo paghatud sa illegal nga drugas diha sa lungsod sa Consolacion.
Si Police Colonel Elmer Lim OIC sa Cebu Police Provincial Office personal nga misaksi sa gipahigayon nga inventory sa mga nasakmit nga ebidensiya gikan sa suspek, matud niya kapin duha ka semana nilang gimonitor ang illegal nga kalihokan ni Chow human duna silay mga nadawat nga report bahin kalambigitan niini sa ilegal nga drugas.
“Iyaha na jud ning trabaho og pangita subra na two weeks sa atong nahibaloan kini matud pa niya nagduwa na siya since March but dili mi motuo kay pagtoo namo dugay na ni siya,” sigon ni Lim.
Atol sa maong operasyon gikatahong nakuhaan kini og dagkong putos nga gidudahang shabu nga motimbang og 1.1 kilo nga mobalor dul an sa P7.5 milyones pesos og lakip sa narekober ang buybust money nga P200 mil budol money.
Ang dinakpan pasakaan og kasong kalapasan sa Sec.5, Sec 11 Art 2 RA 9165 Comprehensive Dangerous Drug Act of 2002. (BANAT NEWS)
- Latest
