Isko nanguyab sa mga botante sa Sugbu

CEBU, Philippines — Nia karon sa Sugbo si Manila City Mayor ug presidential aspirant Isko Moreno Domagoso alang sa duha ka adlaw nga pagpanguyab sa mga botanteng Sugboanon.

Pipila ka rally ang gipahigayon uban sa mga supporters niini sa dakbayan sa Sugbo ang pagahimuon.

Una diha sa Barangay Guadalupe gym kagahapon apan wala siya personal nga nakatambong. Girepresentahan hinuon siya sa iyang asawa nga si Dynee ug anak nga si Joaquin.  Sa iyang pakighinabi ngadto sa mga botante sa barangay Guadalupe si Dynee nagpasalamat sa mga nisuporta sa iyang bana.

Si Dynee miingon, base sa iyang nakitang suporta sa mga tawo ngadto sa iyang bana, dili tukma ang nanggawas nga surveys.

Si Isko nitambong sa campaign sortie sa Barangay Tinago sa dakbayan sa Sugbo. Matud niya bisan didto siya natawo ug nagdako sa Tondo, Manila, Bisaya siyang dako kay taga Samar man iyang inahan.

“Lagi na lamang ang usapan tungkol sa pula, tungkol sa dilaw, ay yellow pink na pala. Lagi for 10 years..Sila ang umiikot ang buhay natin sa pamamahala ng grupo ng dalawang kuponan. 21 years na pula, 18 years na dilaw, after 39 years, kumusta kayo?” matud ni Domagoso.

Ang pula maoy color nga gidala ni presidential aspirant Bongbong Marcos, samtang ang yellow maoy matud pa nipaluyo sa kanidatora ni Bise Presidente Leni Robredo. Apan ang gidala ni Robredo karon mao ang pink color.            Gikan sa Tinago milahos si Isko sa Lapu-Lapu alang sa konsiyerto.

Karong adlawa, si Isko gikatakda nga mobisita usab sa mga lungsod sa Southwest Cebu.  Mga alas 3 sa hapon motambong kini sa Youth Summer Festival sa Aloguinsan,  dayon moadto sa Bojo River ug kataposan nga tambongan ang concert didto sa dakbayan sa Toledo.— IBM (BANATNEWS)