Register of Deeds sa Cebu City, laing tulo gikiha
CEBU, Philippines — Nag-atubang karon og kiha ang Register of Deeds sa Siyudad sa Sugbo tungod sa pagdali-dali niini og luwat og Transfer Certificate of Title.
Base sa nahipos nga dokumento sa Banat News nga si Atty. Marlo Cugtas niluwat niadtong Hulyo 26, 2019 sa TCT No. 107-2019003108 ngadto sa usa ka Diana Sabesaje, taga Cogon-Ramos, Cebu City, sa samang adlaw nga gihimo ang Affidavit of Loss ug Deed of Confirmation Extrajudicial Declaration of Heirs and Sale.
Inabagan ni Atty. Vicente Fernandez II, ang mga reklamante mao sila si Anthony Duyan sa Binondo, Manila; Necita Orijuela sa Marikina City, ug Adela Acuna sa Quezon City kinsa nisang-at sa ilang joint judicial affidavit batok ni Cugtas, Diana, Jimmy Lanorias ug Mavourenee Staritte Lanorias sa Cebu City Prosecutor’s Office niadtong Oktuber 28, 2019.
Niadtong Septiyembre 13, 2015, ang mga reklamante nakapalit og luna nga yuta sa may V. Rama Avenue, Cebu City sa gidak-on nga 120-square meters, ubos sa TCT No. 147923 gikan sa sumosunod nilang Isabel Abucejo, Rosario Rama, Guillermo Rama, Restituto Rama, Francisco Rama, Carolina Rama, Emmie Rama, Jay Romeo Colina ug Jake Romeo Rama Colina, kinsa nihimo og Extrajudicial Settlement of Heirs, Adjudication ug Deed of Absolute Sale sa igo-igo nga kantidad.
Nadiskubrehan ang giingong mga kahiwian sa mga dokumento dihang ilang gi-follow-up ang Certificate Authorizing Registration (CAR) sa Bureau of Internal Revenue diin ang mga gikiha niusab sa TCT No. 147923 ngadto sa pangan sa usa ka Diana A. Sabesaje gamit ang mga gimao-mao nga mga dokumento.
Nasuta sab ang nga mga notarya sa mga dokumento wala motakdo sa kung unsay naa sa Notarial Book sa Office of the Clerk of Court, Notarial Division sanglit laing tawo ang nabutang niini. Usa sa mga kahiwian mao ang ang TCT No. 107-2019003108, Affidavit of Loss ug Deed of Confirmation Extrajudicial Declaration of Heirs and Sale nga parehong gipetsahan og Hulyo 26, 2019 samtang ang Deed of Confirmation of Extrajudicial gipetsahan og Hulyo 23, 2019.
Ang mga reklamante nipasangil nga ang kapaspas sa paggawas sa titulo dili kini mahitabo kung walay kunsabo sa sulod sa buhatan sa Register of Deeds. (BANATNEWS)
- Latest
