CCENRO ug DPS gikwestiyon ni konsehal Garganera

CEBU, Philippines – Gikwestiyon ni Konsehal Joel Garganera ang Cebu City Environment and Natural Resources Office (CCENRO) ug Department of Public Services (DPS) kalabot sa post closure rehabilitation plan sa Inayawan landfill.

Kahinumduman nga gipasirad-an sa Court of Appeals ang landfill niadtong Disyembre 15, 2016 gumikan sa kalapasan niini sa environmental laws ug non-compliance sa sanitary requirements diin ang kagamhanan sa siyudad sa Sugbo gimanduan sa pag-rehabilitate niini.

Matud ni Garganera nga hangtod karon walay post closure rehabilitation plan nga gipresentar diha sa konseho sa siyudad. Gibutyag ni Garganera nga giingong adunay nitumaw nga taho nga intensiyon sa siyudad nga mobutang og waste to energy facility diha sa upat ka ektaryang luna duol sa Inayawan landfill.

“These projects must be dealt with strict scrutiny coupled with the observance of due diligence in compliance with the decision of the court, otherwise, the city might be held in contempt”, tipik sa resolusyon ni Garganera.

Buot ni Garganera nga maklaro ang maong report tungod kay iyang nabantayan nga sobra na  tunga sa bilyon o P500 milyones ang nagasto mahitungod sa solid waste management apan giingong ang palibot dili limpiyo.

“Sige sila og reklamo sa niaging administrasyon nga gilisud-lisod pa nila ang pagpasar og mga budget mahitungod sa aning garbage disposal ug makita ninyo sa miaging administrasyon a little over P100 million ra ang atong gi-budget ato niya limpiyo atong palibot niya karon times four na pero tan-awa atong palibot kontento ba ta?”, matud ni Garganera.

Ang pangulo sa CCENRO Nida Cabrera sa iyang bahin, nibutyag sa adlaw’ng Miyerkules sunod semana ang presentation sa consultant sa rehabilitation plan diin isumitir kini sa ilahang buhatan. (/BDB)(BANAT NEWS)