Traysikad, bisekleta bawal na sa CSCR

CEBU, Philippines — Dakpon na unya ang mga drayber sa traysikad ingon man bisekleta nga padayong moagi sa Cebu South Coastal Road sa Dakbayan sa Talisay.

Apan si Joy Tumulak, kinsa maoy Focal Person sa Capitol Traffic Management nipasabot nga ang Barangay San Roque ug Inayawan una ang ilang unahon o matawag nga pilot area sa maong pagpatuman sa lagda sa trapiko.

Kini human ilang nakita nga ang maong lugar mao gyud ang chokepoint sa mga sakyanan ilabi na nga daghan gyud nga mga traysikad nga manglabang o moagi pa sa SRP.  Matud pa ni Tumulak nga gawas pa nga magdala kini og trapik nakamugna pa gyud kini og peligro sa drayber ingon man sa ilang mga pasahero.

Sa miaging semana, nagtigum na ang taga Land Transportation Office (LTO), kapitan sa Inayawan ug San Roque alang sa pagpatuman niini sa ilang lugar.

Hinuon giangkon ni Tumulak nga aduna gyu’y maapektahan sa ilang laraw apan kinahanglan man sab gyud kini ipatuman alang sa kaayohan sa kinabag-an.

Moabot sa usa ka libo ka mga traysikad ang maapektuhan niini hinungdan nga gitun-an pa kini nila kon unsaon nga dili gyud maapektuhan ang panginabuhian sa mga drayber sa traysikad.

Sa nasayran, daghan na ang nireklamo batok sa mga traysikad sa SRP ilabi na nga mga hambugero ug mao pay isog ang mga drayber sa ilang pagpaugat og labang sa maong highway kon may mobadlong kanila. (BANAT NEWS)