6 taktakon kun positibo gihapon

CEBU, Philippines - Paabuton una ni Kapitan Althea Lim sa Barangay Poblacion Pardo ang resulta sa confirmatory test sa mga trabahante sa ilang barangay nga nagpositibo sa gipahigayong surprise drug test sa Cebu City Office on Substance Abuse Prevention (COSAP).

Nasayran nga sa 87 ka mga trabahante sa barangay nga gipaubos sa drug test, 6 niini ang nagpositibo sa pagamit og shabu, diin 3 kanila ang loaders, 2 ka drivers ug 1 ang tanod.

Matud ni Kapitan Lim, magpaabot siya sa confirmatory test sulod 15 ngadto sa 30 ka adlaw aron masuta kun kunpirmado ang 6 nga positibo sa paggamit og ginadiling drugas, dili na niya sila hatagan og laing higayon nga makatrabaho sa barangay.

Gibutyag sa kapitana nga kanunay siyang nagpahimangno sa iyang mga trabahante nga likayan ang drugas kay aduna gyuy ipahigayon nga surprise drug test.  Gitug-an ni Lim nga unsaon niya paglimpyo sa drugas sa ilang barangay kun diha mismo sa iyang tugkaran adunay tiggamitan niini.

Nanghinaut ang kapitana nga masabtan siya sa mga trabahante ug sa mga Pardohanon nga unahon usa niya paglimpyo ang iyang mga ginsakpan hangtud na ngadto sa iyang mga konstituwente. (BANAT NEWS)