PJ Garcia, laing duha niduso og COC sa Comelec

CEBU, Philippines — Sa unang adlaw sa pagduso sa sertipiko de kandidatora sa mga gustong magpapili sa umaabot nga May 2025 nga elekyon sa Probinsya sa Sugbo, tulo pa lang ka kandidato ang miduso sa ilang certificate of candidacy (COC) ngadto sa Office of the Provincial Election Supervisor (OPES) kagahapon.

Ang pinakauna nga nakaduso mao ang incumbent nga kongresista sa tersero distrito nga si Pablo John "PJ" Garcia.

Si Garcia buot magpapili balik pagkakongresista sa maong distrito alang sa iyang ika-tulong termino. Si Garcia maoy secretary general sa One Cebu.

Ikaduha nga miduso sa iyang COC mao si Salvador Cariaga nga buot magpapili pagka kongresista sa kuatro distrito isip independente nga kandidato

Si Cariaga usa ka mag-uuma ug tag-iya sa Arapal Nature Farms sa siyudad sa Bogo. Sa niaging eleksyon, milansar pud siya sa susamang position apan napildi.

Ang ika-tulo miduso sa Comelec Cebu Province  mao si Odysseus C. Camarillo nga buot usab magpapili pagka bokal sa segundo distrito.

Si Camarillo nga taga Argao milansar isip usa ka independente alang sa umaabot nga eleksyon.--  IBM BANAT NEWS