Sisterhood agreement naumol tali sa sugbo ug bohol

CEBU, Philippines — Bisan og duha na lang ka probinsya ug tulo ka highly urbanized cities (HUCs) ang nahabilin sa rehiyon siete (7), gisaad sa mga dagkong opisyal sa Probinsya sa Sugbo ug sa Probinsya sa Bohol nga dili mabiyaan ang Central Visayas pag-abot sa kalamboan sa ekonomiya.

Base sa 2022 nga Regional Gross Domestic Product (GDP), moabot sa P1.287 trillion ug adunay growth rate nga 7.6%, apil pa hinoon niini ang Negros Occidental ug Siquijor.

Apan sumala sa NEDA sa maong configuration bisan og sa tuig 2022 pa kini, ang Bohol ug Cebu uban sa mga HUCs sa Cebu, Mandaue ug Lapu-Lapu City, adunay kombinasyon nga P1.108 trillion o 7.6% gihapon. Pasabot niini, dako gihapon ang GRDP sa maong mga probinsya ug HUCs bisan og wala ang Siquijor ug Negros Oriental.

Atol sa maong session, ang “rules” gisuspenso usa aron paghatag og higayon sa duha ka gobernador nga sila gobernadora Gwen Garcia ug Bohol Governor Erico Aristotle Aumentado nga parehong special guest sa maong joint session kagahapon, Nobiyembre 18, didto sa Capitol Sociall Hall.

Si Aumentado nagkanayon nga karon nga ang lalawigan sa Bohol ug Cebu na lang ang nahabilin sa Central Visayas, kinahanglan adunay kooperasyon sa matag himoon niini isip usa ka hiniusang                rehiyon. 

Si Gobernador Garcia miuyon usab sa mensahe ni Aumentado nga kinahanglan adunay pagtinabangay ang duha ka lalawigan pag-abot sa mga programa ug proyekto sa mga konstituwente niini, aron makab-ot ang tinguha nga mahimong “economic power house “ ang tibuok Visayas.

"Aron mahinumdoman gyud sa tanan, di na lang ta magtawag og region 7, gikan karon ang uban masayod, unsa ni nga rehiyon ato ning tawgon nga ‘SugBohol’," matud ni Garcia.

Atol sa joint session, ang duha ka provincial board mipasar usab og tagsa tagsa ka resolusyon alang sa paghimo og “sisterhood agreement” tali sa duha ka lalawigan alang sa padayon nga kolaborasyon pag-abot sa economic growth, tourism, culture ug uban pa.

Ang region 7 gilangkoban na lang sa probinsya sa Sugbo ug Bohol uban sa mga HUCs sa Mandaue, Lapu-Lapu ug Cebu City human nga nahimo na nga balaod ang pag-himo sa Negros Island Region diin nihiusa kini sa Negros Oriental ug Negros Occidental uban sa Probinsya sa Siquijor. (BANAT NEWS)