Traffic enforcer gidasmagan

CEBU, Philippines — Pasakaan og kaso sa kagamhanan sa Dakbayan sa Sugbo ang SUV driver nga nakadasmag og usa ka traffic enforcer sa Cebu City Transportation Office samtang nagdumala kini sa dagan sa trapiko sa eskina sa mga dalan F. Cabahug ug Pope John Paul.

Ang maong insidente nahitabo niadtong Septiyembre 30, 2024 sa alas 6:20 sa gabii kun diin usa ka SUV ang nidasmag sa traffic enforcer nga si Jo Baculi.  Ang labaw sa Cebu City Transportation Office nga si Raquel Arce misaysay nga wala mosunod ang SUV driver sa direksyon nga gimando ni Baculi ug milahos hinuon kini hangtud nabanggaan si Baculi.

Si acting Mayor Garcia miingon nga human niya nakita ang maong video, matud pa niya nga mura kini og gituyo og dasmag.  Sa CCTV Footage makita ang usa ka traffic personnel nga si Baculi nag-man sa traffic ug nisensyas sa usa ka SUV nga paagion kini sa tukma nga lane, apan mipadayon gihapon kini og dagan hangtud nabanggaan ang traffic enforcer ug natumba.  Nakabangon kini apan nagtikaang ang usa ka tiil. “Grabe kaayo ang iyang gibuhat, I really think that it is done with malice. Grabe na man sab, di na man to aksidente, tinuyo na man to,” suma pa ni Garcia.

Nimando na si Garcia ngadto kang Konsehal Rey Gealon kinsa chairman sa CCTO-Traffic Management Committee nga mangulo sa pagpasaka og criminal case batok sa babayeng drayber.  “We are very serious about that. Gukdon ‘to namong draybera. Dapat ma-trace ug file cases. That is a criminal case with intent,”ni Garcia pa.

Sa habig ni Konsehal Gealon, kasong kriminal ug administratiba ang ilang ipasaka ngadto sa LTO alang sa pagbawi sa lisensya sa maong driver.   “Depending on the extent of injuries sustained by CCTO traffic enforcer Jo Baculi, we will file a criminal case for reckless imprudence resulting to physical injuries, to say the least, if we cannot make out a case of frustrated homicide under the circumstances,” suma pa ni Gealon.

Mipasalig si Garcia nga abagan sa kagamhanan si Baculi.—  Rowena Capistrano/IBM BANAT NEWS