“No segregation, no collection” sa basura hingusgan

CEBU, Philippines — Hingusgan ni acting Cebu City Mayor Raymond Alvin Garcia ang pagpatuman sa “No Segregation, No Collection” sa basura sa matag panimalay sa syudad aron maminusan ang ilabay nga toneladang basura sa Binaliw Landfill.

Nasayran nga ang Binaliw landfill mao karon ang usa sa mainitong gituki sa konseho tungod sa reklamo gikan sa mga residente tungod sa pag-alisngaw sa baho gikan sa maong landfill, ug nasayran sab nga sobra 850-900 ka tonelada nga basura ang malabay sa landfill matag adlaw.

“Sa akong pagngadto sa Binaliw landfill ang akong nakuha didto is 50 percent of the waste or trash that is being dumped there or thrown there is already plastics and you know very well nga plastics are recyclables. So, kung na-segregate pa lang na daan sa household, less na ang malabay didto sa Binaliw landfill,” saysay pa ni Acting Mayor Garcia.

Matud pa ni Garcia nga kinahanglan matudluan gyud ang matag panimalay kung unsaon paglainlain sa ilang mga basura.

“I think that is essential, the segregation. But, again, this is not an overnight solution. Kinahanglan man gyud ni og education, not only education but a campaign nga we should teach our constituents segregation, so that at source ma-segregate na nato ug gamay nalang ang malabay nato didto sa landfill,” suma pa ni Garcia.

Gipahibalo ni Garcia nga gituki na nila sa Department of Public Services (DPS) nga adunay duha o tulo ka barangay nga ilang unhan sa istrikto nga pagpangampanya kabahin sa segregation policy apan kasamtangang naghuwat na lang siya sa guidelines nga ipatuman. (BANAT NEWS)