Garcia moumol og joint task force batok sa illegal fishing

CEBU, Philippines — Magporma og joint task force si Cebu City Mayor Raymond Alvin Garcia human sa nahitabong “blast fishing”o binayo sa Mactan Channel niadtong Sabado, Marso 8, 2025.

Gipakita sa pangu sa Bantay Dagat Commission nga si Ed Karlon Rama ang mga hulagway atubangan sa mga sakop sa media ang patay nga mga isda nga ilang nakuha sa kadagatan sa dakbayan.

Lakip usab sa gipakita ang mga nangagusbat nga mga coral human sa ilang pakisusi sa nahitabong insidente.

Sa imbestigasyon nga ilang gipahigayon, matud pa ni Rama nga misugid kanila ang mga residente duol sa nahitabuan nga adunay upat ka mga pumpboat nga nagpabuto sa makaupat nga higayon sulod sa 45 minutos.

Gitug-an sab sa mga lumulupyo nga dili residente sa dakbayan ang mga mananagat tungod kay mosutoy sab kini og padagan sa ilang pumpboat paingon sa syudad sa Talisay.

Matud pa ni Rama kun masakpan ang mga nagbinayo, pasakaan kini og kaso sa paghupot og illegal nga mga pabuto.

Miabot na sab ang maong taho ngadto kang Garcia mao nga gimanduan niya si Rama nga magmugna og inter-LGU task force nga langkuban gikan sa Dakbayan sa Lapu-Lapu, Munisipalidad sa Cordova, ug Dakbayan sa Talisay aron nga adunay dali nga moresponde kung adunay susamang insidente kabahin sa illegal nga panagat. (BANAT NEWS)