49 ka ilegalista sikop sa operasyon sa PRO-7
CEBU, Philippines — Niabot sa 49 ka ilegalista ang nasikop sa 46 ka operasyon nga gipahigayon sa Police Regional Office (PRO)-7 batok sa ilegal nga drugas gikan Septiyember 30, 2024 hangtud sa Oktubre 1, 2024.
Nakasakmit sa kapolisan ang 215.72 gramo nga shabu nga nagkantidad tanan ngadto sa P1.4 milyon.
Gawas niini, nakasakmit usab ang kapolisan og 18 ka stalks sa marijuana nga nagkantidad og dul-an P4,000.
Sa loose firearms, 63 ka operasyon ang napahigayon sa kapolisan diin 61 ka armas ang nasakmit ug gi-surrender, upat ka tawo ang nadakpan ug duha ka explosives ang nakompiska.
Nagpahigayon usab ang kapolisan og 28 ka operasyon batok sa illegal gambling diin 46 ka sugarol ang nadakpan ug kapin sa P4,000 nga pusta ang nasakmit.
Samtang sa wanted persons 46 ka tawo ang nadakpan diin 35 niini other wanted persons ug 11 ang most wanted persons.
Sa laing bahin, tulo ka suspetsadong durugista ug napuhag ang usa ka drug den atol sa buy-bust operation nga gipahigayon sa PDEA Bohol Provincial Office uban sa Bohol Maritime Police, Loon Municipal Police Station ug Coast Guard Intelligence Unit-Bohol ngadto sa Barangay Mocpoc Sur, Lungsod sa Loon, Probinsiya sa Boho.
Ang maong operasyon gipahigayon niadtong Martes.
Nadakpan ang subject sa operasyon ug drug den maintainer nga si Paulito Aparece, alyas “Botyok”, 44-anyos, delivery boy ug duha ka tigbisitahan sa drug den nga sila si Angelo Toso, 28-anyos, delivery boy, ug pag-umangkon nga si Joemark Toso, 2, delivery boy usab.
Nasakmitan ang suspetsado og siyam ka paketeng shabu nga niabot og 13 gramos ang timbang nga nikantidad og P81, 600, buy-bust money, cash nga P150 nga gituohang halin sa illegal drugs, tulo ka cellphones ug nagkalain-laing drug paraphernalia. (BANAT NEWS)
- Latest
