Edipisyo sa Lagtang National High School wala pasudli tungod sa mga liki

CEBU, Philippines — Wala pa gihapon pasudli og balik sa mga tinun-an ang upat ka andana nga edipisyo sa Lagtang National High School.

Kini gumikan sa nakita nga pagpangliki sa edipisyo human niigo ang 5.1 magnitude nga linog niadtong Domingo sa hapon. Si Renester Suralta, principal sa Lagtang National High School nibutyag nga gisuspenso una nila ang face to face classes sa 400 ka tinun-an nga nag-ukopar sa edipisyo.

Nasayran nga adunay 12 ka section gikan sa grades 7, 8, 9 ug 10 ang maong eskwelahan.

Hinuon padayon ang ilang modular distance learning aron dili maputol ang pagtuon sa mga bata.

Matud ni Suralta nga gihimo nila ang modular distance learning gumikan sa rekomendasyon sa City Engineering Office human sa ilang paghimo sa inspeksiyon.

Si Engineer Niño Nemenzo sa City Engineering Office nagkanayon nga usa lang ang Lagtang National High School sa tulo nila ka tunghaan nga gisusi.

Ilang gitan-aw ang kalig-on o integridad sa edipisyo human nila nakita ang pagpangliki.

Tinguha nila nga luwas ang kabataan ug magtutudlo hinungdan nga ilaha unang gialihan og plywood ang agi-anan sa edipisyo aron walay makasulod niini.

Ang ilang findings sa pagsusi iduso kini ngadto sa Talisay City DepEd Division aron tukion sa lokal nga kagamhanan.

Sa laing bahin, nitabon ang yuta ug bato diha sa karsada tungod sa Isay View Deck sa Barangay Manipis, Dakbayan sa Talisay kagahapon sa kadlawon.

Kini human sa pagbunok sa uwan matud ni Konsehal Emma Cabiluna sa Manipis.

Matud ni Cabaluna nga wala tuod nadisgrasya sa panghitabo apan daghan ang wala makaagi.

Gibana-bana nga 75 metros sa karsada ang natabonan sa yuta ug mga bato.

Nagtuo si Cabiluna nga natandog ang yuta gumikan sa pagtrabaho sa karsada sa maong dapit ug napun-an kini sa pagbunok sa uwan nga maoy nakapahumok sa bukid. Wala man tuod natabonan og apil ang Isay View Deck apan dili lang sa kini nila pasudlan og mga tawo.

Ang Isay View Deck mao ang lugar nga nahimo nang estambayan sa mga bikers ug katawhan diin diha makita ang bukid nga porma og “dinosaur”.

Ang City of Talisay-Traffic Operation Development Authority (CT-TODA) niabot sa lugar ug ni assist sa mga motorista nga mobalik sa ilang mga agi.

Gipaningkamotan sa Department of Public Works and Highways (DPWH) pinaagi sa QM Builders nga maoy nagtrabaho sa karsada nga ilang mahawan ang mga yuta ug bato nga mitabon sa karsada. (BANAT NEWS)